షావోమి ఓ ఫాస్ట్ ఛార్జర్‌ను సిద్ధం చేసింది. 4,000 ఎంఏహెచ్‌ బ్యాటరీ అయినా 20 నిమిషాల్లోపు ఫుల్‌ ఛార్జి చేయడం దాని ప్రత్యేకత. షావోమి వైర్‌లెస్‌ ఫాస్ట్ ఛార్జర్లను తీసుకురావడం కొత్తేమీ కాదు. గతంలో 50 వాట్‌ ఫాస్ట్ ఛార్జర్‌ను ప్రపంచ మార్కెట్‌లోకి తీసుకొచ్చింది. ఆ ఛార్జర్‌ 4,500 ఎంఏహెచ్‌ బ్యాటరీని కేవలం 40 నిమిషాల్లో ఫుల్‌ ఛార్జ్‌ చేసింది. ఇప్పుడు 80 వాట్‌ వైర్‌లెస్‌ ఫాస్ట్ ఛార్జర్‌ను రూపొందించింది. ఇది 4,000 బ్యాటరీని 19 నిమిషాల్లో పూర్తి ఛార్జి చేసింది. దీనికి సంబంధించిన వీడియోను షావోమి తన యూట్యూబ్‌ ఛానల్‌లో విడుదల చేసింది.
వచ్చే ఏడాది 100 వాట్‌ వైర్‌లెస్‌ ఫాస్ట్ ఛార్జర్లు వస్తాయని టెక్‌ వర్గాలు ఇప్పటికే వెల్లడించాయి. అయితే, అది ఏ సంస్థ నుంచి వస్తుందో చెప్పలేదు. ఇప్పుడు షావోమి ఛార్జర్‌ను చూస్తుంటే 100 వాట్‌ ఛార్జర్‌ షావోమి నుంచే వచ్చేలా కనిపిస్తోంది. మిగిలిన సంస్థలు కూడా ఆ ప్రయత్నం చేయొచ్చు. వచ్చే ఏడాది ప్రథమార్ధంలో వచ్చే ఎంఐ 11 సిరీస్‌తో 80 వాట్‌ వైర్‌లెస్‌ ఫాస్ట్ ఛార్జర్‌ను లాంచ్‌ చేస్తారని అంటున్నారు. చూద్దాం ఈ ఫాస్ట్ ఛార్జర్ల పరుగు ఎంతవరకు వెళ్తుందో.
