దేశంలో వ్యాప్తి చెందుతున్న కరోనాను అరికట్టేందుకు దిగ్గజ ఐటీ సంస్థ విప్రో దాని అనుబంధ సంస్థలు, అజీమ్ ప్రేమ్జీ ఫౌండేషన్ కలిసి రూ.1,125 కోట్ల సాయం ప్రకటించి పెద్దమనసు చాటుకున్నాయి. ఈ వనరులు మహమ్మారిపై పోరాటానికి, వైరస్ వ్యాప్తిని తగ్గించడానికి సహాయపడతాయని ఆ సంస్థలు అభిప్రాయపడ్డాయి. ముఖ్యంగా మన సమాజంలో అత్యంత వెనకబడిన వర్గాలవారికి వైద్య సేవలు అందించడానికి ఉపయోగపడతాయని సంస్థ ఓ ప్రకటనలో తెలిపింది.
సమష్టిగా..
విప్రో లిమిటెడ్ రూ.100 కోట్లు, విప్రో ఎంటర్ ప్రైజస్ లిమిటెడ్ రూ.25 కోట్లు, అజీమ్ ప్రేమ్జీ ఫౌండేషన్ రూ.1000 కోట్ల మేర విరాళాలు అందజేస్తున్నట్లు అధికారులు తెలిపారు. ఏడాదిలో చేసిన కార్పొరేట్ సామాజిక బాధ్యత కార్యక్రమాలు కాకుండా.. అదనంగా ఈ సాయం చేస్తున్నట్లు పేర్కొన్నారు.
విరాళాల వెల్లువ
ఇప్పటికే టాటా గ్రూపు రూ.1,500 కోట్లు, రిలయన్స్ ఇండస్ట్రీస్ రూ.500 కోట్లు, ఇన్ఫోసిస్ రూ.100 కోట్లు కరోనాపై యుద్ధం కోసం విరాళాలు అందించాయి.
ఇదీ చూడండి: 'తిండి లేదు... బీర్లతోనే సరిపెట్టుకుంటున్నాం సార్'
