ఉద్దీపన చర్యలతో లాభాల్లో స్టాక్​మార్కెట్లు

ఆర్థిక మందగమనాన్ని అధిగమించేందుకు కేంద్రం తీసుకున్న ఉద్దీపన చర్యలు మార్కెట్​ సెంటిమెంట్​ను బలపరిచాయి. విదేశీ పెట్టుబడిదారులపై సర్​ఛార్జీ తొలగింపు, వాహన, ఆర్థిక సేవల రంగాలకు ప్రోత్సాహకాలు మంచి ఫలితాలను ఇస్తున్నాయి. ఫలితంగా సోమవారం స్టాక్​మార్కెట్లు లాభాలతో ప్రారంభమయ్యాయి.

స్టాక్​మార్కెట్లు సోమవారం లాభాలతో ప్రారంభమయ్యాయి. శ్రీమంతులు, విదేశీ సంస్థాత పెట్టుబడిదారులపై సర్​ఛార్జీ తొలగింపు, వాహన, ఆర్థిక సేవల రంగాలను ప్రోత్సహించేందుకు ప్రభుత్వం ఉద్దీపన చర్యలు చేపట్టిన నేపథ్యంలో మార్కెట్లు లాభాలబాట పట్టాయి.

బొంబాయి స్టాక్​ ఎక్స్ఛేంజి సూచీ సెన్సెక్స్​ ఆరంభంలో 662 పాయింట్లు ఎగబాకి 37వేల 364 వద్ద గరిష్ఠస్థాయిని తాకింది. తర్వాత కాస్త నెమ్మదించింది. ప్రస్తుతం 120 పాయింట్ల వృద్ధితో 36 వేల 821 వద్ద కొనసాగుతోంది. జాతీయ స్టాక్ ఎక్స్ఛేంజి సూచీ నిఫ్టీ 27 పాయింట్లు లాభపడి 10 వేల 856 వద్ద ట్రేడవుతోంది.

లాభాల్లో

ఎస్​బీఐ, ఎమ్ అండ్​ ఎమ్, బజాజ్​ ఫిన్​సెర్వ్, హెచ్​డీఎఫ్​సీ, ఎస్​ బ్యాంకు, హెచ్​డీఎఫ్​సీ బ్యాంకు రాణిస్తున్నాయి.

నష్టాల్లో

వేదాంత, టాటా స్టీల్, హిందాల్కో, సిప్లా, సన్​ఫార్మా, హెచ్​సీఎల్ టెక్​, ఇన్ఫోసిస్ నష్టాల్లో ట్రేడవుతున్నాయి.

రూపాయి విలువ

రూపాయి విలువ 42 పైసలు క్షీణించి ఒక యూఎస్ డాలరుకు రూ.72.08గా ఉంది.

ఇదీ చూడండి: సిరి: యువతకు ఆర్థిక భరోసా కోసం ఇవి తప్పనిసరి!