చైనాకు చెందిన 59 యాప్లపై కేంద్ర ప్రభుత్వం నిషేధం విధించిన నేపథ్యంలో.. వాటి వినియోగదారులు స్వదేశీ యాప్లవైపు మళ్లుతున్నారు. ప్రభుత్వ ప్రకటన తర్వాత షేర్చాట్, రొపొసొ, చింగారీ వంటి దేశీయ యాప్ల డౌన్లోడ్స్, సైనప్స్ భారీగా పెరిగాయి.
గత రెండు రోజుల్లో తమ యాప్ డౌన్లోడ్స్లో ఊహించని వృద్ధి నమోదైనట్లు దేశీయ అతిపెద్ద ప్రాంతీయ భాషా సామాజిక మాధ్యమం షేర్చాట్ వెల్లడించింది. చైనా యాప్లపై నిషేధం విధించినప్పటి నుంచి గంటకు 5 లక్షల మేర డౌన్లోడ్స్ అయ్యాయని, రెండు రోజుల్లో మొత్తం 15 మిలియన్ల మంది వినియోగదారులు పెరిగారని తెలిపింది.
"షేర్చాట్కు ప్రజల నుంచి వస్తోన్న ఆదరణ చూసి మేము చాలా సంతోషిస్తున్నాం. ఈ ఆదరణ భారతీయ సామాజిక మాధ్యమాల్లో మేము అగ్రగామిగా నిలిచేలా చేస్తుంది. ఇది షేర్చాట్కు మరో విజయానికి పునాది వేస్తుందనే నమ్మకం ఉంది."
- ఫరీద్ అహ్సాన్, షేర్చాట్ సీఓఓ, సహవ్యవస్థాపకుడు
చైనా యాప్లను నిషేధించటంపై ప్రభుత్వానికి మద్దతుగా ఇప్పటి వరకు ఒక లక్షకుపైగా పోస్టులు వచ్చాయని, వాటిని మిలియన్కుపైగా వినియోగదారులు లైక్ చేసినట్లు సంస్థ తెలిపింది. అందులో 5 లక్షలు వాట్సాప్లోకి షేర్ చేసినట్లు వెల్లడించింది.
రొపొసొ..
టిక్టాక్ వినియోగదారులు, అత్యధికంగా ఫాలోవర్స్ ఉన్నవారు.. నిషేధం తర్వాత తమ యాప్ను ఎంచుకుంటున్నట్లు షార్ట్ వీడియో యాప్ రొపొసొ తెలిపింది. టిక్టాక్లో 9.5, 9 మిలియన్ ఫాలోవర్స్ ఉన్న ప్రేమ్ వాట్స్, నూర్ అఫ్సాన్ వంటి వారు తమ యాప్ను డౌన్లోడ్ చేసుకున్నారని ప్రకటించింది. రొపొసొ.. 12 భారతీయ భాషల్లో అందుబాటులో ఉండగా.. 14 మిలియన్ల మంది యూజర్స్ ఉన్నారు. నెలకు 80 మిలియన్ల వీడియోలు పోస్ట్ అవుతున్నాయి.
బాక్స్ఎంగేజ్.కామ్
చైనా యాప్లపై నిషేధం విధించిన 24 గంటల్లోనే 10 రెట్ల వృద్ధితో లక్షకుపైగా వినియోగదారులు పెరిగినట్లు బాక్స్ఎంగేజ్.కామ్ తెలిపింది. లాక్డౌన్ విధించిన సమయంలోనే ఈ వెబ్సైట్ను ప్రారంభించారు. సమాచార గోప్యత సవాళ్ల నేపథ్యంలో ప్రస్తుతం వెబ్సైట్ను నడుపుతుండగా.. త్వరలోనే మొబైల్ యాప్ను తీసుకురానున్నట్లు తెలిపింది సంస్థ.
చింగారీ..
టిక్టాక్కు ప్రత్యామ్నాయంగా భావిస్తున్న చింగారీ యాప్కు ఆదరణ భారీగా పెరిగింది. 10 రోజుల్లో 5,50,000 డౌన్లోడ్స్ కాగా, మొత్తం డౌన్లోడ్స్ 20,50,000లకు చేరాయి.
ఇదీ చూడండి: చైనా యాప్లకు ఇవి ప్రత్యామ్నాయం.. ట్రై చేయండి!
