వారాంతంలో స్టాక్ మార్కెట్లపై బేర్ పంజా విసిరింది. బీఎస్ఈ-సెన్సెక్స్ భారీగా 746 పాయింట్లు తగ్గి 48,878 వద్దకు చేరింది. ఎన్ఎస్ఈ- నిఫ్టీ 218 పాయింట్లు కోల్పోయి 14,371 వద్ద స్థిరపడింది. మార్కెట్లు నష్టాలతో ముగియటం వరుసగా ఇది రెండో సెషన్.
ఇటీవల వరుసగా రికార్డు స్థాయి లాభాలను గడిస్తూ వస్తున్నాయి సూచీలు. సెన్సెక్స్ గురువారం 50 వేల మార్క్ను కూడా దాటింది. అయితే ఈ లాభాలను మదుపరులు సొమ్ము చేసుకునే పనిలో పడటం నష్టాలకు ప్రధాన కారణంగా తెలుస్తోంది. అంతర్జాతీయంగా అన్ని మార్కెట్లూ భారీగా పతనమవడం కూడా మరో కారణమని విశ్లేషకులు చెబుతున్నారు.
దాదాపు అన్ని రంగాల ఒడుదొడుకులు ఎదుర్కొనగా.. బ్యాంకింగ్ షేర్లు అత్యధిక నష్టాలను నమోదు చేశాయి.
ఇంట్రాడే సాగిందిలా..
సెన్సెక్స్ 49,676 పాయింట్ల అత్యధిక స్థాయి, 48,832 పాయింట్ల అత్యల్ప స్థాయిలను నమోదు చేసింది.
నిఫ్టీ 14,619 పాయింట్ల గరిష్ఠ స్థాయి 14,357 పాయింట్ల కనిష్ఠ స్థాయిల మధ్య కదలాడింది.
లాభనష్టాల్లోనివి ఇవే..
30 షేర్ల ఇండెక్స్లో బజాజ్ ఆటో, హెచ్యూఎల్, అల్ట్రాటెక్ సిమెంట్, టీసీఎస్, బజాజ్ ఫిన్సర్వ్ షేర్లు మాత్రమే లాభాల్లో ఉన్నాయి.
యాక్సిస్ బ్యాంక్, ఏషియన్ పెయింట్స్, ఐసీఐసీఐ బ్యాంక్, ఇండస్ఇండ్ బ్యాంక్, ఎస్బీఐ, బజాజ్ ఫినాన్స్ షేర్లు భారీగా నష్టాలను నమోదు చేశాయి.
ఇతర మార్కెట్లు
ఆసియాలో ఇతర ప్రధాన స్టాక్ మార్కెట్లు అయిన.. షాంఘై, టోక్యో, సియోల్, హాంకాంగ్ సూచీలూ శుక్రవారం భారీ నష్టాలను మూటగట్టుకున్నాయి.
ఇదీ చూడండి:పద్దులో మధ్యతరగతి వర్గం కోరుతున్నదేమిటి?
