ఆపరేషన్ కశ్మీర్, ప్రపంచ మార్కెట్ల నుంచి బలహీన సంకేతాలు, బ్యాంకింగ్, ఆర్థిక, లోహ రంగాల్లో తీవ్రమైన అమ్మకాల కారణంగా దేశీయ మార్కెట్లు నష్టాలపాలయ్యాయి.
ఓ దశలో 700 పాయింట్ల వరకు పతనమైన బీఎస్ఈ సెన్సెక్స్ 37వేల మార్కును కోల్పోయింది. చివరకు 418 పాయింట్ల(1.13 శాతం) నష్టంతో 36 వేల 699 వద్ద ముగిసింది. జాతీయ స్టాక్ ఎక్స్ఛేంజ్ సూచీ నిఫ్టీ 134.75 పాయింట్లు (1.23 శాతం) తగ్గి 10 వేల 862.60 వద్ద స్థిరపడింది.
' ఆపరేషన్ కశ్మీర్' ఎఫెక్ట్
కేంద్రప్రభుత్వం సోమవారం జమ్ముకశ్మీర్కు ప్రత్యేక హోదా కల్పించే ఆర్టికల్ 370, ఆర్టికల్ 35ఎ లను రద్దు చేసింది. ఇది తీవ్ర రాజకీయ ఉద్రిక్తతలకు కారణమైంది. ఫలితమే దేశీయ స్టాక్మార్కెట్ల భారీ పతనం.
తగ్గిన చైనా కరెన్సీ విలువ
300 బిలియన్ డాలర్ల విలువైన చైనా ఉత్పత్తులపై 10శాతం సుంకం విధించాలని అమెరికా నిర్ణయించింది. ట్రంప్ సర్కారు నిర్ణయాన్ని తటస్థీకరించేందుకు చైనా తన కరెన్సీ విలువను తగ్గించిందనే అంచనాల మధ్య... డాలరుతో పోలిస్తే యువాన్ 7.03కు పడిపోయింది.
రూపాయి విలువ
రూపాయి విలువ 90 పైసలు తగ్గి ఒక డాలరుకు మారకం విలువ రూ.70.50ల వద్ద ఉంది.
ముడిచమురు
ప్రపంచ మార్కెట్లో ముడిచమురు ధర 0.74 శాతం తగ్గింది. బ్యారెల్ ధర 61.43 డాలర్లుగా ఉంది.
ఆసియా మార్కెట్లు
అమెరికా-చైనా వాణిజ్య యుద్ధం ప్రభావంతో ఆసియా మార్కెట్లయిన షాంఘై కాంపోజిట్, హాంగ్సెంగ్, నిక్కీ, కోస్పీ నష్టాలపాలయ్యాయి.
ఇదీ చూడండి: మోదీ, షాల సాహసం భేష్: అడ్వాణీ
