హైదరాబాద్లో త్వరలోనే జీ+ 57 అంతస్తులతో అత్యంత ఎత్తయిన నివాస సముదాయం ఏర్పాటు కానుంది. ఈ ప్రాజెక్టుకు సంబంధించిన అన్ని అనుమతులను ఆర్ఈఆర్ఏ(రియల్ ఎస్టేట్ రెగ్యులేటరీ అథారిటీ) మంజూరు చేసింది. నగరానికి చెందిన ప్రముఖ రియల్ ఎస్టేట్ సంస్థ సాస్ ఇన్ఫ్రా.. కోకాపేటలో 4.5 ఎకరాల స్థలంలో 'క్రౌన్'(SAS CROWN) పేరిట ఈ ప్రాజెక్టుకు రూపకల్పన చేయనుంది. భవనం ఎత్తు 228 మీటర్లు కాగా ఒక్కో అంతస్తులో ఒక్క అపార్ట్మెంట్ మాత్రమే ఉంటుంది. మొత్తం ఐదు టవర్లలో ఈ ప్రాజెక్టును సాస్ నిర్మిస్తోంది.
విలాసవంతంగా
ఒక్కో అపార్ట్మెంట్ 6,565 చదరపు అడుగులు, 6,999 చదరపు అడుగులు, 8,811 చ.అ విస్తీర్ణాన్ని కలిగి ఉంటాయి. డూప్లెక్స్ అపార్ట్మెంట్ 17,000 చదరపు అడుగుల విస్తీర్ణంలో నిర్మితం కానుంది. ఈ ప్రాజెక్టులో ఆధునిక హంగులతో స్విమ్మింగ్ పూల్ ప్రత్యేక ఆకర్షణగా నిలవనుంది. 8,811 చ.అడుగుల ఫ్లాట్కు రూ. 8.81 కోట్లు ధర నిర్ణయించినట్లు సాస్ ఇన్ఫ్రా ప్రతినిధి తెలిపారు. 6,565చ.అకు రూ.6.57 కోట్లు, 6,999 చ.అకు రూ. 7కోట్లు ధరగా నిర్ణయించారు. డూప్లెక్స్ అపార్ట్మెంట్కు ఈ ధర రెట్టింపు అయ్యే అవకాశం ఉంది.
సకల హంగులతో
ఇంకా ఈ భవన సముదాయంలో సమావేశాలకు, ఫంక్షన్లకు 69,000 చదరపు అడుగుల విస్తీర్ణంలో ప్రత్యేకంగా మల్టీ ఫంక్షన్హాల్ను నిర్మించనున్నారు. వ్యాపార కార్యకలాపాలు, చిన్న పిల్లలు ఆడుకునేందుకు వీలుగా, వినోదం కోసం సకల హంగులతో లాంజ్ను ఏర్పాటు చేయనున్నారు. 2027 వరకు ఈ ప్రాజెక్టు పూర్తవుతుందని సాస్ వెల్లడించింది.
జీ+ 44తో
సుమధుర గ్రూపు, వాసవి గ్రూపు భాగస్వామ్యంతో 'ది ఒలింపస్' పేరిట గచ్చిబౌలి/నానక్ రామ్ గూడ ప్రాంతంలో 44 అంతస్తుల భవనానికి శ్రీకారం చుట్టింది. 5.16 ఎకరాల్లో పొడవైన రెండు టవర్లు నిర్మితం కానున్నాయి. 854 కుటుంబాలు నివాసం ఉండేలా ఈ ప్రాజెక్టుకు రూపకల్పన జరిగింది. ఈ ప్రాజెక్టుకు రూ. 1000 కోట్లు పెట్టుబడి పెడుతున్నట్లు సుమధుర గ్రూప్ ఛైర్మన్ జి. మధుసూధన్ తెలిపారు. 3బీహెచ్కే, 3.5బీహెచ్కే అపార్ట్మెంట్లుగా 1670- 3000 చ.అల విస్తీర్ణంలో వినియోగదారులకు అందిస్తామని చెప్పారు. ప్రాజెక్టును 2025 డిసెంబరు కల్లా పూర్తయ్యేలా చర్యలు తీసుకుంటున్నట్లు వివరించారు. భవిష్యత్తులో 6 మిలియన్‌ చదరపు అడుగుల విస్తీర్ణంలో నిర్మాణాలు చేపడతామని, అందులో 3 మిలియన్‌ల విస్తీర్ణం హైదరాబాద్లో, మరో 3 మిలియన్‌ల విస్తీర్ణంతో బెంగళూరులో నిర్మాణాలు చేపడతామని తెలిపారు. ఇందుకు రూ. 2వేల కోట్లు అవసరమని అంచనా వేస్తున్నట్లు వివరించారు.
ఇదీ చదవండి: Kishan Reddy: ఎన్ని లక్షల కోట్లు ఖర్చైనా అందరికి టీకా ఇచ్చి తీరుతాం
