లాక్డౌన్ కారణంగా ఇంట్లోనే ఉంటున్న తమ ఖాతాదారులకు బీఎస్ఎన్ఎల్ శుభవార్త ప్రకటించింది. గతవారం కాలపరిమితి ముగిసిన ఖాతాదారులకు ఏప్రిల్ 20 వరకు వ్యాలిడిటీని పొడిగిస్తూ ఆ సంస్థ కీలక నిర్ణయం తీసుకుంది. ఇది పూర్తిగా ఉచితమని పేర్కొంది. వినియోగదారులు ఇన్కమింగ్ కాల్స్ అందుకునేందుకే ఈ కాలపరిమితిని పొడిగించినట్టు వివరించింది.
జీరో బ్యాలెన్స్‌కు చేరుకున్న వినియోగదారులకు ఉచితంగా పది రూపాయల విలువైన టాక్‌టైంను కూడా అందిస్తున్నట్టు తెలిపింది.
దేశవ్యాప్తంగా 21 రోజుల లాక్డౌన్ కొనసాగుతున్న నేపథ్యంలో టెలికాం సంస్థలకు 'ట్రాయ్' చేసిన సూచనల మేరకు ఈ నిర్ణయం తీసుకుంది బీఎస్ఎన్ఎల్.
ఎయిర్టెల్ కూడా...
భారతీ ఎయిర్టెల్ కూడా బీఎస్ఎన్ఎల్నే అనుసరించింది. దేశవ్యాప్తంగా తమకు ఉన్న 80 మిలియన్ల మంది ప్రీపెయిడ్ ఖాతాదారుల వ్యాలిడిటీ గడువును వచ్చే నెల 17 వరకు పొడిగిస్తున్నట్టు స్పష్టం చేసింది ఎయిర్టెల్. ప్రకటించిన గడువు వరకు నిరంతరాయంగా ఇన్కమింగ్ కాల్స్ అందుకోవచ్చని తెలిపింది. దీనికి అదనంగా 10 రూపాయల టాక్‌టైమ్‌ను అందించనున్నట్టు వెల్లడించింది. వచ్చే 48 గంటల్లో ఈ ప్రయోజనాలు ఖాతాదారులకు అందుతాయని పేర్కొంది.
