జియో గిగా ఫైబర్ 4కె సెట్టాప్ బాక్స్ రూపంలో అసాధారణ సేవలు అందించేందుకు సిద్ధమైంది రిలయన్స్. ఇప్పటికే అతి తక్కువ ధరకు అంతర్జాలాన్ని, అపరిమిత కాలింగ్ సేవలను అందిస్తూ టెలికారం రంగంలో విప్లవం సృష్టించిన జియో.. ఇప్పుడు మరో సంచలనానికి తెరతీసింది. బ్రాడ్బ్యాండ్, డీటీహెచ్ రంగాన్ని సరికొత్త పుంతలు తొక్కించడానికి సర్వసన్నద్ధమైంది. నేటినుంచే ఈ సేవలు దేశవ్యాప్తంగా అందుబాటులోకి రానున్నాయి.
మిక్స్డ్ రియాలిటీ
వర్చువల్ రియాలిటీ, ఆగ్మెంటెడ్ రియాలిటీలను కలిపి మిక్స్డ్ రియాలిటీ అనే పేరుతో జియో కొత్త సాంకేతికతను అభివృద్ధి చేసింది. దీని ద్వారా వినియోగదారులు ఇంట్లోనే ఉండి షాపింగ్ చేయవచ్చు. తమకు నచ్చిన దుస్తులను వర్చువల్ రియాలిటీ చూసుకుని అనంతరం ఆన్లైన్లో ఆర్డర్ చేయవచ్చు. విద్య, వినోద రంగాల్లోనూ ఈ పద్ధతి వినియోగించుకోవచ్చు. అంతరిక్షం లాంటి సంక్లిష్ట అంశాలనూ మిక్స్డ్ రియాలిటీతో సులువుగా అర్థం చేసుకోవచ్చు.
టీవీలో... వీడియో కాలింగ్
టీవీలో వీడియో కాలింగ్ చేసుకునేందుకు 'జియో కాల్' పేరిట ఓ యాప్ను అందిస్తున్నారు. టీవీకి యూఎస్బీ కెమెరా అనుసంధానం చేసి... అవతలవారి మొబైల్, ల్యాప్ట్యాప్లకు కాల్చేసి వీడియో కాన్ఫరెన్స్లో మాట్లాడవచ్చు.
రూ.500కే... అంతర్జాతీయ కాల్స్
అపరిమిత అంతర్జాతీయ కాల్స్కు వీలుగా ఇంటర్నేషనల్ ల్యాండ్లైన్ రోమింగ్ ప్యాక్ను అతి తక్కువ ధరకే జియో అందిస్తోంది. ప్రస్తుతం ప్రయోగాత్మకంగా నెలకు రూ.500 ధరతో అమెరికా, కెనడాలకు అపరిమిత కాల్స్ చేసుకునేందుకు అవకాశం కల్పిస్తోంది. రిలయన్స్ ప్లాన్ ప్రస్తుత టారిఫ్లతో పోల్చితే ఇది 5 లేదా 10వ వంతు ఉంటుందని అంచనా.
వీడియో గేమింగ్..
జియో సెట్టాప్ బాక్స్లో వాయిస్సెర్చ్తో పాటు గేమింగ్ సౌకర్యాలు కల్పించారు. సెట్టాప్ బాక్స్ను టీవీకి అనుసంధానం చేసి, దేశంలోని ఏ ప్రాంతంలో ఉన్నవారితోనైనా సరే వర్చువల్ ఆన్లైన్ గేమ్స్ ఆడుకోవచ్చు. ఇందుకోసం అనేక సంస్థలతో రిలయన్స్ ఒప్పందం చేసుకుంది.
జియో సావన్, జియో టీవీ
జియో ఫైబర్ సేవలు ఆస్వాదించేందుకు 4కె సెట్టాప్ బాక్స్ అత్యంత కీలకం. దీని ద్వారా వినియోగదారులు ప్రస్తుతం వీక్షిస్తున్న డీటీహెచ్ ఛానళ్లతో పాటు ఓవర్ ద టాప్ ద్వారా జియో సావన్, జియో టీవీల లాంటి పలు రకాల సేవలు పొందవచ్చు.
ఇదీ చూడండి: భారత్-రష్యా మధ్య 15 కీలక రంగాల్లో ఒప్పందాలు
