పీఎఫ్ చందాదారులు యూఏఎన్ నంబర్‌తో ఆధార్ అనుసంధానం చేయడాన్ని ఉద్యోగుల భవిష్యనిధి సంస్థ (ఈపీఎఫ్ఓ) తప్పనిసరి చేసింది. ఆగస్టు 31ను ఇందుకు తుది గడువుగా విధించింది. ఒకవేళ ఆధార్‌ను జత చేయలేకపోతే సెప్టెంబర్‌ 1 నుంచి పీఎఫ్‌కు సంబంధించి ఎలాంటి సేవలూ పొందలేరని స్పష్టం చేసింది. యాజమాన్యాలు పీఎఫ్ మొత్తాలను జమ చేయలేకపోవడమే కాకుండా.. పీఎఫ్‌కు సంబంధించి చందాదారులు కూడా నగదును ఉపసంహరించుకోలేరు పేర్కొంది.
సోషల్‌ సెక్యూరిటీ కోడ్‌ కింద ఆధార్‌ను తప్పనిసరి చేస్తూ కేంద్ర కార్మిక మంత్రిత్వ శాఖ మే 3న ఓ నోటిఫికేషన్‌ విడుదల చేసింది. తొలుత ఈపీఎఫ్ ఖాతాకు ఆధార్ జత చేయడానికి జూన్‌ 1ను గడువుగా విధించింది ఈపీఎఫ్ఓ. దాన్ని తాజాగా ఆగస్టు 30 వరకు పొడిగించింది. ఇది వరకే మీరు ఆధార్‌తో మీ పీఎఫ్ ఖాతాను జత చేసి ఉంటే మరోసారి ధ్రువీకరించుకోండి. ఒకవేళ జత చేయకుంటే వెంటనే ఆ పని పూర్తి చేయడం మేలు.
ఆధార్‌ను జత చేయండిలా..
- ముందుగా ఈపీఎఫ్ఓ మెంబర్‌ పోర్టల్‌కు వెళ్లండి. మీ యూజర్‌ నేమ్‌, పాస్‌వర్డ్‌తో లాగిన్‌ అవ్వండి.
- మెనూ బార్‌లోని మేనేజ్‌ ఆప్షన్‌కు వెళ్లండి.
- అక్కడ డ్రాప్‌డౌన్‌ మెనూలోని కేవైసీ ఆప్షన్‌ను ఎంచుకోండి.
- మీకు అక్కడ పలు రకాల ఆప్షన్లు కనిపిస్తాయి. అందులో ఈపీఎఫ్‌తో ఆధార్ అనుసంధానం ఆప్షన్‌ ఎంచుకోండి.
- మీ ఆధార్ కార్డుపై ఉన్న విధంగా మీరు పేరు, ఆధార్ నంబర్‌ను ఎంటర్‌ చేయండి.
- ఒకసారి సేవ్‌ చేశాక యూఐడీఏఐ డేటాతో మీ ఆధార్ వివరాలను ఈపీఎఫ్ఓ సరిపోల్చుతుంది.
- అనుసంధానం పూర్తయ్యాక ఆధార్ వివరాల తనిఖీ పూర్తయినట్లుగా మీకు వెరిఫైడ్‌ టిక్‌ మార్క్‌ చూపిస్తుంది.
ఇదీ చదవండి: గిఫ్ట్ కార్డులు, క్యాష్ బ్యాక్లకు జీఎస్టీ వర్తింపు!
