మీ పాన్ కార్డుకు ఆధార్ కార్డును అనుసంధానించారా..? చేయకపోతే వెంటనే ఆ పని కానివ్వండి. ఎందుకంటే పాన్ కార్డుకు ఆధార్ అనుసంధానం చేయడానికి ఈ నెల 31 చివరి తేది. అయితే ఏంటీ ఎప్పటిలానే మళ్లీ గడువు పెంచుతారు అనుకుంటున్నారా? ఇప్పటికే చాలా సార్లు కేంద్రం అనుసంధాన పక్రియకు గడువు పెంచింది. ఈసారి ఆ ఆవకాశం ఉండకపోవచ్చు.
పాన్ కార్డుకు ఆధార్ను అనుసంధానించడానికి 2018 జూన్ 30న చివరి తేదీగా నిర్ణయించింది ఆదాయపుపన్ను శాఖ. కానీ దేశంలో చాలామంది ఆధార్ నమోదు పక్రియకు ఇబ్బందులు ఎదురవుతుండటాన్ని గ్రహించి గడువును ఈ ఏడాది మార్చి 31కి పెంచింది. ఈ రెండు పత్రాల అనుసంధానానికి దాదాపు 5 సార్లు గడువు పెంచింది ఆదాయపు పన్ను శాఖ.
సులువుగా ఈ అనుసంధాన పక్రియను ఎలా పూర్తి చేయాలో ఈటీవీ భారత్ ప్రత్యేక కథనంలో చూద్దాం.
ఐటీఆర్ వెబ్సైట్లో సులభంగా పూర్తి చేయవచ్చు:
ఐటీఆర్ వెబ్సైట్లో లాగిన్ అయి అక్కడ ఉన్న లింక్ను క్లిక్ చేసి పాన్ కార్డుకు ఆధార్ అనుసంధానించవచ్చు.
మొదట మీరు మీ ఆధార్, పాన్ కార్డును సిద్ధంగా ఉంచుకోండి.
⦁ ఆదాయపు పన్ను శాఖ వెబ్సైట్ "https://www.incometaxindiaefiling.gov.in/home" లో లాగిన్ అవ్వండి . హోమ్ పేజ్లో మీకు ఎడమవైపు "క్విక్ లింక్స్" అనే బటన్ కనిపిస్తుంది. దానిపై క్లిక్ చేయగానే చాలా అంశాలు వస్తాయి. అందులో "లింక్ ఆధార్" అనే ఆప్షన్పై క్లిక్ చేయండి.
⦁ లింక్ ఆధార్ బటన్పై క్లిక్ చేయగానే అది మిమ్మల్ని మరో పేజిలోకి తీసుకెళుతుంది. అందులో కచ్చితంగా పూర్తి చేయాల్సిన దరఖాస్తు ఫారం ఉంటుంది. అందులో మీ వివరాలను నమోదు చేయండి.
⦁ ఫారం పూర్తి చేయగానే మీ పాన్ కార్డు నెంబర్ని నింపమని అడుగుతుంది. దీని తరువాత ఆధార్ నంబర్ పూరించమని అడుగుతుంది. ఆ తర్వాత మీ పేరు అడుగుతుంది. చాలా మంది తప్పు చేసేది ఇక్కడే. ఎటువంటి తప్పులకు ఆస్కారం ఇవ్వకుండా ఆధార్ కార్డులో మీ పేరు ఎలా ఉందో అలాగే నింపండి. మీరు పుట్టిన సంవత్సరం నింపండి.
⦁ పక్రియ దాదాపు చివరి అంకానికి వచ్చినట్లే మొత్తం పూర్తయిన తరువాత క్రింద భాగంలో లింక్ ఆధార్ అనే ఆప్షన్ వస్తుంది. దానిపై క్లిక్ చేస్తే అది మరో పేజ్లోకి తీసుకెళ్తుంది. మీరు పన్ను చెల్లింపు దారు కింద రిజిష్టర్ అయి ఉంటే ఈ-ఐటీఆర్లోకి లాగిన్ అయి నిర్ధారించమని అడుగుతుంది. మీరు పన్ను చెల్లింపు దారులు కానట్లయితే మీరు విజయవంతంగా అనుసంధాన పక్రియ పూర్తి చేసినట్లు సందేశం వస్తుంది.
2. సందేశం ద్వారా చిటికెలో:
మీ మొబైల్ నుంచి ఓ చిన్న సందేశాన్ని పంపంటం ద్వారా పాన్ కార్డుకి ఆధార్ అనుసంధాన పక్రియ పూర్తి చేయవచ్చు.
మీ మొబైల్లో "UIDPAN" అని టైప్ చేసి స్పేస్ ఇచ్చి 12 అంకెల ఆధార్ నెంబర్ని టైప్ చేయండి. మళ్లీ స్పేస్ ఇచ్చి 10 అంకెల పాన్ నెంబర్ని టైప్ చేసి 567678 లేదా 56161 నంబర్కు కాని సందేశం పంపండి. అయితే ఇక్కడ గుర్తుంచుకోవాల్సిన విషయం ఏమిటంటే మీరు ఏ మొబైల్ నెంబర్ నుంచి సందేశం పంపిస్తున్నారో అది మీ ఆధార్ కార్డుతో రిజిష్టర్ అయి ఉండాలి.
