దేశంలోని అన్ని ఇన్సూరెన్స్ సంస్థలు 'సరళ్ జీవన్ బీమా'ను 2021 జనవరి 1లోగా ప్రారంభించాలని కోరింది భారత బీమా నియంత్రణ, అభివృద్ధి ప్రాధికార సంస్థ(ఐఆర్డీఏఐ). ఈ మేరకు ఆయా బీమా సంస్థలకు మార్గదర్శకాలను విడుదల చేసింది ఐఆర్డీఏఐ.
ఈకొత్త పాలసీని అనుమతిపొందిన అన్ని జీవిత బీమా సంస్థలు అందిస్తాయని ఐఆర్డీఏఐ మార్గదర్శకాలు వెల్లడిస్తున్నాయి. ప్రస్తుతం ఉన్న పాలసీల్లో విభిన్న నిబంధనలు, షరతుల కారణంగా ఎంపిక సమయంలో వినియోగదారులు పడుతున్న ఇబ్బందులను తొలగించేందుకు ఈ బీమాను తీసుకొచ్చింది ఐఆర్డీఏఐ.
లింగ బేధం, నివాస స్థలం, వృత్తి, విద్యార్హతలు వంటివాటితో సంబంధం లేకుండా.. అందరికీ ఈ బీమా వర్తించనుంది. ఈ పాలసీతో బీమా సంస్థలు, వినియోగదారుల మధ్య నమ్మకాన్ని బలపడుతుందని ఆశాభావం వ్యక్తంచేసింది.
బీమా వివరాలు ఇవే..
- 18 నుంచి 65 ఏళ్ల వయసు కలిగి ఉన్నవారందరు అర్హులు
- కాల వ్యవధి: కనిష్ఠంగా నాలుగేళ్లు-గరిష్ఠంగా 40ఏళ్లు
- బీమా మొత్తం - రూ. 5లక్షల నుంచి రూ. 25లక్షల వరకు..
ఎంతో ప్రయోజనకారి..
'సరళ్ జీవన్ బీమా' విధానం దేశ అవసరాలకు అనుగుణంగా ఉంటుందని బజాజ్ అలియాంజ్ లైఫ్ ఇన్సూరెన్స్ చీఫ్ భరత్ కలాసి అన్నారు. బీమా ప్రణాళికలపై మరింత అవగాహన పెంచేందుకు సాయపడే ఈ పాలసీని తాము స్వాగతిస్తున్నట్టు చెప్పారు. ఇది వినియోగదారులకు మరింత ప్రయోజకరంగా ఉంటుందన్నారు.
ఈ బీమా విధానాన్ని 'భారత్' పాలసీగా పరిగణించారు 'పాలసీబజార్.కామ్' లైఫ్ ఇన్సూరెన్స్ బ్రాండ్ అధికారి(సీబీఓ) సంతోష్ అగర్వాల్. ఇప్పటివరకూ ఎలాంటి బీమా చేయనివారు 'సరళ్ జీవన్ పాలసీ'ను ఎంచుకోవడం ఉత్తమమని ఆయన సూచించారు.
ఇదీ చదవండి: వైద్య బీమా పాలసీలకు రంగులు
