బీమా సంస్థలు కరోనా మరణాల క్లెయిమ్లను కూడా పరిష్కరించాల్సిందేనని లైఫ్ ఇన్సూరెన్స్ కౌన్సిల్ తేల్చిచెప్పింది. కొవిడ్-19 మరణ దావాల విషయంలో 'ఫోర్స్ మెజర్' నిబంధన వర్తించదని స్పష్టం చేసింది.
వేగంగా పరిష్కరించాలి..
కొవిడ్-19తో చనిపోయిన వారి క్లెయిమ్లను... ప్రభుత్వ, ప్రైవేట్ సంస్థలన్నీ అత్యంత వేగంగా పరిష్కరించాలని జీవిత బీమా మండలి ఆదేశించింది. ముందుగా తెలియని, నియంత్రించలేని పరిస్థితులకు 'ఫోర్స్ మెజర్'ను అమలు చేస్తారు. కరోనా మరణాలకు దీనిని వర్తింపజేయడం లేదని జీవిత బీమా మండలి స్పష్టం చేసింది.
ఎంతో మంది వినియోగదారులు ఈ విషయంలో స్పష్టత కోసం బీమా సంస్థల చుట్టూ తిరుగుతున్నారని పేర్కొంది. ఈ నిబంధనపై వివాదాలు, వదంతులకు తావులేదని జీవిత బీమా మండలి స్పష్టం చేసింది. బీమా సంస్థలను ఈ విషయాన్ని తమ వినియోగదారులకు వ్యక్తిగతంగా తెలియజేయాలని ఆదేశించింది.
"ప్రపంచవ్యాప్తంగా కరోనా మహమ్మారి వ్యాపిస్తున్న వైనం... ఇంట్లో ప్రతి ఒక్కరికి జీవిత బీమా ప్రాథమిక అవసరమని నొక్కి చెబుతోంది. లాక్డౌన్ వల్ల వినియోగదారులకు కలుగుతున్న అంతరాయాన్ని తగ్గించేందుకు జీవిత బీమా రంగం అన్ని చర్యలూ తీసుకుంటోంది. కరోనా మరణాల క్లెయిమ్లతో సహా ఎన్నో సేవలను డిజిటల్ రూపంలో అందజేస్తున్నాం. ఈ క్లిష్ట సమయంలో బీమా సంస్థలన్నీ తమ వినియోగదారులకు అండగా నిలవాలి. తప్పుడు సమాచారం, వదంతలు వ్యాపించకుండా చూడాలి."
-ఎస్.ఎన్ భట్టాచార్య, జీవిత బీమా మండలి సెక్రటరీ జనరల్
ఇంతకు ముందు జీవిత బీమా పాలసీదారుల ప్రీమియం చెల్లింపు గడువును 30 రోజుల పాటు ఐఆర్డీఏఐ పెంచింది. ఫలితంగా మార్చి, ఏప్రిల్ నెలల ప్రీమియం చెల్లించాల్సిన పాలసీదారులకు కాస్త ఉపశమనం కలిగినట్లైంది.
ఇదీ చూడండి: 28 శాతం తరిగిపోయిన ముకేశ్ అంబానీ ఆస్తులు
