Instagram: 'స్టోరీస్​' చేసేయ్​.. డబ్బులు సంపాదించేయ్​!

దేశంలో టిక్​టాక్ బ్యాన్ అయిన తర్వాత.. ఆ మార్కెట్​ను అందుకునేందుకు ఇన్​స్టాగ్రామ్​ రీల్స్​ ఫీచర్​ను తీసుకొచ్చింది. ఇప్పుడు మరో నయా ఫీచర్​తో మరింత మంది యూజర్లను ఆకర్షించేందుకు ప్రయత్నిస్తోంది. త్వరలో రానున్న ఈ ఫీచర్​ ద్వారా క్రియేటర్లు డబ్బు సంపాదించే వీలు కల్పిస్తున్నట్లు సమాచారం.

ఫేస్​బుక్​కు చెందిన ఫొటో షేరింగ్ యాప్​ ఇన్​స్టాగ్రామ్(Instagram).. మరో కొత్త ఫీచర్​ను తీసుకువచ్చేందుకు సిద్ధమైంది. 'ఎక్స్​క్లూజివ్​ స్టోరీస్​' పేరుతో రానున్న ఈ ఫీచర్(Instagram latest features)​తో క్రియేటర్స్​ కూడా డబ్బులు సంపాదించే అవకాశం ఉందని సమాచారం.

ఇప్పటికే ఉన్న స్టోరీస్​ ఫీచర్​కు మరిన్ని హంగులు దిద్ది.. ఈ ఎక్స్​క్లూజివ్​ స్టోరీస్​ను రూపొందించింది ఇన్​స్టాగ్రామ్. ఇంకా స్పష్టంగా చెప్పాలంటే.. ఇటీవల ట్విట్టర్​ తీసుకొచ్చిన 'సూపర్​ ఫాలో' ఫీచర్​కు పోటీగా ఇన్​స్టా ఈ కొత్త ఫీచర్​ను తీసుకువచ్చినట్లు తెలుస్తోంది.

ఎలా పని చేస్తుంది?

ఇది సాధారణ స్టోరీస్​లాంటి ఫీచరే అయినప్పటికీ.. ఇందులో భారీ మార్పులు చేయనుంది ఇన్​స్టా. ఇందులో స్టోరీస్​ను తమ ఫాలోవర్స్​లో ఎవరు చూడాలి అనేది యూజర్​ నిర్ణయించుకోవచ్చు. ఎక్స్​క్లూజివ్ స్టోరీస్​ను స్క్రీన్​షాట్​ తీసుకునే అవకాశం కూడా ఉండదు. ఇతర యూజర్లు ఈ స్టోరీస్ చూడాలంటే డబ్బులు చెల్లించి మెంబర్​షిప్​ తీసుకోవాల్సి ఉంటుంది. మెంబర్​షిప్​ తీసుకున్నవారు మాత్రమే ఎక్స్​క్లూజివ్ స్టోరీస్​ చూసేందుకు వీలుంటుంది.

అయితే ఈ ఫీచర్​.. ఇన్​స్టా క్రియేటర్​ బ్యాడ్జ్​ ఉన్నవారికి మాత్రమే అందుబాటులో ఉండనుందని తెలుస్తోంది. దీనిపై మరింత స్పష్టత రావాలంటే ఇన్​స్టాగ్రామ్​ నుంచి అధికారిక ప్రకటన వెలువడాల్సిందే.

ఇదీ చదవండి:పిక్సల్స్ ఎక్కువ​ ఉంటేనే మంచి ఫోనా?