ప్రభుత్వ రంగ విమానయాన సంస్థ ఎయిర్ ఇండియా(Air India news) ప్రైవేటీకరణలో కీలక ప్రక్రియ ముగిసింది. ఎయిర్ ఇండియాలో వాటాను రూ.18,000 కోట్లకు విక్రయించేందుకు టాటా సన్స్ గ్రూపుతో ఒప్పందం కుదుర్చుకుంది కేంద్రప్రభుత్వం. ఈ మేరకు ప్రభుత్వ ఆస్తుల నిర్వహణ విభాగం (డీఐపీఎం) కార్యదర్శి ట్విట్టర్ వేదికగా తెలిపారు.
"ఎయిర్ ఇండియా వ్యూహాత్మక పెట్టుబడుల కోసం టాటా సన్స్‌తో ప్రభుత్వం ఈరోజు వాటా కొనుగోలు ఒప్పందంపై సంతకం చేసింది."
-తుహిన్ కాంత పాండే, డీఐపీఎం కార్యదర్శి
భారీ సంక్షోభంలో కూరుకుపోయిన ఎయిర్ ఇండియాను టాటా గ్రూప్ సొంతం చేసుకుంది. ఇటీవల ముగిసిన బిడ్ల ప్రక్రియలో వివిధ సంస్థలు తమ బిడ్లను సమర్పించగా.. అందులో నుంచి టాటా గ్రూప్ను ప్రభుత్వం ఎంపిక చేసింది. కేంద్ర ప్రభుత్వం అధికారికంగా ఈ విషయాన్ని వెల్లడించింది.
టాటా- ఎయిర్ఇండియా బంధం పాతదే..
భారత్కు స్వాతంత్ర్యం రాకముందే.. అప్పటి టాటా గ్రూప్ ఛైర్మన్ జేఆర్డీ టాటా.. 1932 'టాటా ఎయిర్లైన్స్' పేరుతో విమానయాన సంస్థను నెలకొల్పారు.1953లో జాతీయీకరణతో ఈ సంస్థ ప్రభుత్వ పరమైంది. అయితే, 1977 వరకు టాటాయే సంస్థ నిర్వహణలో కీలక పాత్ర పోషించింది. తిరిగి 68 ఏళ్ల తర్వాత వారు ప్రారంభించిన సంస్థ వారి చేతుల్లోకే వెళ్లింది.
