నూతన సంవత్సరంలో మ్యూచువల్ ఫండ్లకు సంబంధించి చాలా నిబంధనలు మారాయి. మ్యూచువల్ ఫండ్స్ను మరింత పారదర్శకంగా, సురక్షితంగా మార్చేందుకు సెబీ కొత్త నిబంధనలను ప్రకటించింది. ఇవి జనవరి 1నుంచి అమల్లోకి రానున్నాయి.
మల్టీ క్యాప్ ఫండ్లలో పోర్ట్ ఫోలియో అలోకేషన్ మార్పు
మల్టీ క్యాప్ ఈక్విటీ మ్యూచువల్ ఫండ్లకు సంబంధించి పోర్ట్‌ఫోలియో అలోకేషన్ నిబంధనలను సెప్టెంబర్‌లో మార్చింది. ఇవి 2021 జనవరి నుంచి అమల్లోకి రానున్నాయి. వీటి ప్రకారం మల్టీ క్యాప్ ఫండ్లలో కనీసం 75 శాతం ఈక్విటీలలో పెట్టుబడి పెట్టాలి. ప్రస్తుతం కనీస ఈక్విటీ పెట్టుబడి 65 శాతంగా ఉంది. కొత్త నిబంధనలు ప్రకారం.. స్మాల్, మిడ్, లార్జ్ క్యాప్‌లలో కనీసం 25 శాతం చొప్పున పెట్టుబడి పెట్టాలి. ప్రస్తుతం ఇలాంటి నిబంధన లేదు. ఫండ్ మేనేజర్లు వారి స్వంత నిర్ణయాన్ని బట్టి పెట్టుబడి చేయొచ్చు.
ఫ్లెక్సీ క్యాప్ పేరిట మరో మ్యూచువల్ ఫండ్ విభాగాన్ని సెబీ ప్రవేశపెట్టింది. దీనిలో 65 శాతం ఈక్విటీలో పెట్టుబడి పెట్టాలి. స్మాల్, మిడ్, లార్జ్ క్యాప్ లలో పెట్టుబడిపై నియంత్రణ లేదు. ఇప్పటికే కొన్ని కంపెనీల మ్యూచువల్ ఫండ్ విభాగాన్ని పునర్వ్యవస్థీకరించాయి.
నెట్ అసెట్ వ్యాల్యూ గణనలో మార్పు
జనవరి 1 నుంచి పెట్టుబడి మొత్తం ఏఎంసీని చేరిన సమయం ఆధారంగా మాత్రమే ఎన్ఏవీ(నెట్ అసెట్ వ్యాల్యూ) నిర్ణీతమౌతుంది. పెట్టుబడి మొత్తంతో పాటు దరఖాస్తు అందిన సమయంతో దీనికి ఎలాంటి సంబంధం లేదు. ఈ కొత్త నిబంధనలు లిక్విడ్, ఓవర్ నైట్ ఫండ్లకు వర్తించవు.
ఇప్పటివరకు ఉన్న నిబంధనల ప్రకారం.. రెండు లక్షల కంటే తక్కువ మొత్తంలో దరఖాస్తు కటాఫ్ సమయం ముందు అందినట్లైతే... పెట్టుబడి ఏఎంసీకి అందకపోయినప్పటికీ, అదే రోజు ఎన్ఏవీ ఆధారంగా యూనిట్లు పొందవచ్చు.
కొత్త రిస్కో మీటర్ టూల్
సెబీ 'వెరీ హై' రిస్క్ విభాగాన్ని రిస్కోమీటర్ టూల్లో ప్రవేశపెట్టింది. ఇది ఎక్కువ రిస్కు ఉన్న మ్యూచువల్ ఫండ్లలో పెట్టుబడి పెట్టాలనుకునే వారు నిర్ణయం సమర్థవంతంగా తీసుకునేందుకు ఉపయోగపడుతుంది. ఈ కొత్త రిస్కోమీటర్ టూల్ జనవరి 1 నుంచి అమల్లోకి వచ్చింది. నెలవారీగా రిస్కును గణించి పోర్ట్‌ఫోలియోతో పాటు అసెట్ మేనేజ్మెంట్ కంపెనీలు తమ వైబ్ సైట్లతో పాటు ఆంఫీ వెబ్ సైట్ లో నెల ముగిసిన అనంతరం 10 రోజుల్లోపు ప్రచురించాలి.
ప్రతి సంవత్సరం రిస్కులో మార్పును కూడా ఏఎంసీలు ప్రచురించాల్సి ఉంటుంది. రిస్కులో మార్పు అది యూనిట్ హోల్టర్ కు తెలియజేయాల్సి ఉంటుంది.
డివిడెంట్ ఆప్షన్ పేరు మార్పు
ఏప్రిల్ 2021 నుంచి డివిడెంట్ ఆఫ్షన్ పేరు మారనుంది. దీనికి బదులుగా ఇన్కమ్ డిస్ట్రిబ్యూషన్ కమ్ క్యాపిటల్ విత్‌డ్రాల్ అని అనాల్సి ఉంటుంది.
ఇంటర్ స్కీమ్ ట్రాన్స్‌ఫర్స్
జనవరి 1 నుంచి క్లోజ్ ఎండెడ్ ఫండ్లలో ఇంటర్ స్కీమ్ ట్రాన్స్‌ఫర్ యూనిట్ల కేటాయింపు జరిగిన మూడు రోజుల్లోపే జరగాలి. దీని అనంతరం చేసుకునేందుకు వీలు ఉండదు. ఇంటర్ స్కీమ్ ట్రాన్స్‌ఫర్‌లో డెట్ పేపర్లను ఒక మ్యూచువల్ ఫండ్ స్కీమ్ నుంచి మరో స్కీమ్‌కు మార్చాల్సి ఉంటుంది. ప్రస్తుతం ఉన్న నిబంధనల ప్రకారం మార్కెట్ ధర వద్దే బదిలీ జరగాలి. కొత్త నిబంధనల ప్రకారం నాలుగు నెలలు నుంచి మార్కెట్, సెక్యూరిటీ గురించి ప్రతికూల వార్తలున్నా.. ఇంటర్నల్ రిస్క్ గణింపులో అలర్ట్ వచ్చినా ఇంటర్ స్కీమ్ ట్రాన్స్ ఫర్ చేసుకోరాదు.
ఇదీ చదవండి : మ్యూచువల్ ఫండ్లపై అపోహలా? అయితే ఇది మీకోసమే
