గత ఏడాది అనూహ్య రీతిలో సంపదను పెంచుకుని ప్రపంచ కుబేరుల్లో ఏకంగా అగ్ర కిరీటాన్ని అందుకున్న టెస్లా సీఈఓ ఎలాన్ మస్క్.. మార్చిలో రెండో స్థానానికి పరిమితమయ్యారు. అయితే టెస్లా షేర్లు తాజాగా 2.2 శాతం క్షీణించడం వల్ల ఆయన రెండో స్థానాన్ని కూడా కోల్పోయారు.
ఓ నివేదిక ప్రకారం మస్క్ సంపద ప్రస్తుతం 160.6 బిలియన్ డాలర్లు. ఈ ఏడాది ఇప్పటి వరకు 9.1 బిలియన్ డాలర్ల సంపదను కోల్పోయారు మస్క్.
ఫ్రాన్స్కు చెందిన లగ్జరీ గూడ్స్ సంస్థ 'ఎల్వీఎంహెచ్' అధినేత బెర్నార్డ్‌ ఆర్నాల్ట్‌ 161.2 బిలియన్ డాలర్ల సంపదతో ప్రపంచ ధనవంతుల్లో రెండో స్థానాన్ని దక్కించుకున్నారు. బెర్నార్డ్‌ ఆర్నాల్ట్‌ సంపద ఈ ఏడాది 47 బిలియన్ డాలర్లు పెరగటం విశేషం.
అమెజాన్ అధినేత జెఫ్ బెజోస్ ప్రపంచ కుబేరుల్లో మొదటి స్థానంలో కొనసాగుతున్నారు.
మస్క్ సంపద తగ్గుదలకు కారణాలు..
చైనాలో టెస్లా ఎదుర్కొంటున్న ఇబ్బందులు షేర్ల విలువ తగ్గేందుకు ప్రధాన కారణంగా తెలుస్తోంది.
బిట్కాయిన్ విలువ ఇటీవల రికార్డు స్థాయిలో తగ్గటం కూడా మస్క్ సంపద క్షీణతకు కారణం. ఎందుకంటే బిట్కాయిన్లో మస్క్ ఈ ఏడాది ఆరంభంలో భారీ పెట్టుబడులు పెట్టారు.
