ఎకనామిస్ట్ ఇంటెలిజెన్స్ యూనిట్ (ఈఐయూ) 2020లో ప్రపంచ వృద్ధి అంచనాలను 2.3 శాతం నుంచి 2.2 శాతానికి తగ్గించింది. కొవిడ్-19 (కరోనా) ప్రపంచ ఆర్థికవ్యవస్థను అతలాకుతలం చేస్తుండడమే ఇందుకు కారణమని స్పష్టం చేసింది.
మహమ్మారి..
చైనా సెంట్రల్ హుబీ రాష్ట్రంలోని వుహాన్లో వెలుగుచూసిన కొవిడ్-19 నేడు పలుదేశాలకు విస్తరించి బీభత్సం సృష్టిస్తోంది. అయితే ఈ వైరస్ వ్యాప్తిని అరికట్టడానికి చైనా పలు నిర్బంధ చర్యలు తీసుకుంటోందని ఈఐయూ పేర్కొంది.
కొవిడ్-19 వల్లనే...
వాణిజ్య ఉద్రిక్తతలు, అమెరికా, చైనా, భారత్ల్లో వాస్తవ జీడీపీ వృద్ధి గణనీయంగా క్షీణించడం, అనేక ఈయూ దేశాల్లో రాజకీయ అనిశ్చితి వల్ల 2019లో ప్రపంచవృద్ధి మందగించింది. కానీ ఇప్పుడు (2020లో) కొవిడ్-19 వల్ల ప్రపంచ వృద్ధికి ముప్పు ఏర్పడింది.
డ్రాగన్ విలవిల
ఈ నేపథ్యంలోనే చైనా వృద్ధి అంచనాలను ఈఐయూ తగ్గించింది. మార్చి చివరి నాటికి కొవిడ్-19ను అదుపుచేయవచ్చని, ప్రజారోగ్య అత్యవసర పరిస్థితి నియంత్రణలోకి రావచ్చని ఈఐయూ అంచనా వేసింది. దీనిని అనుసరించి 2020లో చైనా వాస్తవ జీడీపీ అంచనాలను 5.9 శాతం నుంచి 5.4 శాతానికి తగ్గించినట్లు ఈఐయూ స్పష్టం చేసింది.
"ఫిబ్రవరి 1నాటికి చైనాలో కొవిడ్-19 వైరస్ మరణాల రేటు 2.2 శాతం వద్ద స్థిరంగా ఉంది. అయినప్పటికీ చైనీస్ నూతన సంవత్సర వేడుకల సమయంలో వైరస్ మరింత వ్యాప్తిచెందే ప్రమాదముందని ఆందోళనలు వ్యక్తమవుతున్నాయి."- ఈఐయూ
భారత్ బాగానే ఉండొచ్చు!
కొవిడ్-19 ఇండియాకు వ్యాపించకపోతే... భారత వృద్ధి సానుకూలంగా ఉంటుందని ఈఐయూ స్పష్టం చేసింది. తక్కువ వడ్డీ రేటుతో ప్రభుత్వం కల్పించే ఉద్దీపనల వల్ల డిమాండ్, పెట్టుబడులు పెరిగే అవకాశముందని ఈఐయూ పేర్కొంది. అందువల్ల 2019కి అంచనా వేసిన 4.9 శాతం కంటే 2020లో భారత వాస్తవ జీడీపీ వృద్ధి 6.1 శాతానికి పెరిగే అవకాశముందని పేర్కొంది.
ప్రమాదమే
కొవిడ్-19 వ్యాప్తిని అరికట్టేందుకు సరిపడా వనరులు, నిర్బంధ విధానాలు లేని దేశాలకు.. వైరస్ వ్యాపించే ప్రమాదముందని ఈఐయూ హెచ్చరించింది. అలాగే ఈ వైరస్ భయాల మూలంగా జనవరి మొదటి పక్షం నాటికి ముడిచమురు ధరలు బ్యారెల్కు 10 డాలర్ల మేర తగ్గాయని నివేదిక తెలిపింది. దీనిని అనుసరించి, 2020లో సగటు చమురు ధరల బ్యారెల్కు 63 డాలర్లుగా ఉండొచ్చని ఈఐయూ అంచనాను వేసింది. పరిస్థితి మరీ క్షీణిస్తే బ్యారెల్ ధర మరో 3 నుంచి 5 డాలర్లు వరకు తగ్గే అవకాశముందని ఈఐయూ తెలిపింది.
ఇదీ చూడండి: వాట్సాప్ రికార్డు: ప్రపంచ వ్యాప్తంగా 200 కోట్ల యూజర్లు
