దిగుమతి చేసుకున్న ఫ్యాన్లు, గిన్నెలు, వంట సామగ్రిపై కస్టమ్స్ సుంకాలను పెంచుతున్నట్టు బడ్జెట్లో ప్రకటించారు కేంద్ర ఆర్థికమంత్రి నిర్మలా సీతారామన్.
వెన్న తీసిన పాలు(స్కిమ్మిడ్ మిల్క్), పలు మద్యపానీయాలు, సోయా ఫైబర్, సోయా ప్రొటీన్, పంచధార, పాడి ఉత్పత్తులపై ఉన్న సుంకాల మినహాయింపును ఉపసంహరించుకున్నట్టు నిర్మల వెల్లడించారు.
ఫ్యాన్లపై ఇంతకు ముందు 7.5శాతంగా ఉన్న కస్టమ్స్ సుంకాలు... తాజాగా 20శాతానికి పెరిగాయి. పింగాణీ, చైనా సిరామిక్, ఉక్కు, రాగితో చేసిన గిన్నెలు-వంటసామగ్రిపై సుంకాలను 20శాతానికి పెంచింది కేంద్రం.
నామమాత్రపు హెల్త్ సెస్...
వైద్య పరికరాలపై నామమాత్రపు హెల్త్ సెస్ను విధించాలని నిర్మల ప్రతిపాదించారు. దీని వల్ల దేశీయ వైద్య పరికరాల రంగానికి ఊతమందుతుందని ఆశాభావం వ్యక్తం చేశారు.
వైద్య పరికరాల కోసం ఒకప్పుడు దిగుమతులపైనే ఆధారపడిన భారత్... ఇప్పుడు సొంతంగా తయారు చేసుకోవడమే కాకుండా విదేశాలకూ ఎగుమతి చేసే స్థాయికి ఎదిగిందని హర్షం వ్యక్తం చేశారు.
ఈ హెల్త్ సెస్తో వచ్చే ఆదాయాన్ని జిల్లాల్లోని ఆరోగ్య కేంద్రాల మౌలిక వసతులకు ఉపయోగించనున్నట్టు పేర్కొన్నారు ఆర్థికమంత్రి.
