Consumer Durables Price Hike: కొత్త ఏడాదిలో గృహోపకరణాలు అయిన ఎయిర్ కండీషనర్స్, టెలివిజన్లు, రిఫ్రిజిరేటర్లు వంటి ఎలక్ట్రానిక్ వస్తువుల ధరలు సుమారు 5 శాతం నుంచి 10 శాతం వరకు పెరగనున్నాయి. ముడిసరకుతో పాటు రవాణా ఛార్జీలు భారీగా పెరగడమే ఇందుకు ప్రధాన కారణమని మార్కెట్ వర్గాలు తెలిపాయి. పెంచిన ధరలు ఈ నెల చివరకు కానీ.. లేక మార్చి నాటికి అమలులోకి రానున్నాయి.
పానసోనిక్, ఎల్జీ, హయర్ లాంటి కంపెనీలు ఇప్పటికే ధరలు పెంచే ఆలోచనలో ఉండగా.. సోనీ, హిటాచీ, గోద్రెజ్ అప్లయన్సెస్ లాంటి సంస్థలు కూడా ఈ త్రైమాసికం చివరకు నిర్ణయం తీసుకోనున్నాయి.
జనవరి నుంచి మార్చి మధ్య కాలంలో సుమారు 5 నుంచి 7 శాతం వరకు వస్తువులపై ధరలు పెరగనున్నట్లు కన్జ్యూమర్ ఎలక్ట్రానిక్స్ అండ్ అప్లయన్సెస్ మ్యానుఫ్యాక్చరర్స్ అసోసియేషన్ (సీమా) తెలిపింది. "ఉత్పత్తులు, అంతర్జాతీయ రవాణా ఛార్జీలు, ముడి పదార్థాల ధరలు భారీగా పెరిగాయి. ఫలితంగా రిఫ్రిజిరేటర్, వాషింగ్ మెషీన్లు, ఎయిర్ కండీషనర్ ధరలను 3 నుంచి 5 శాతం వరకు పెంచాలని నిర్ణయించాం" అని హయర్ అప్లయన్సెస్ ఇండియా ప్రెసిడెంట్ సతీష్ తెలిపారు.
పానసోనిక్ ఇప్పటికే ఏసీల ధరలను 8 శాతం వరకు పెంచింది. మిగిలిన వాటి ధరలను మరింత పెంచాలని యోచిస్తున్నట్లు ఆ సంస్థ ఇండియా డివిజనల్ డైరెక్టర్ ఫుమియాసు ఫుజిమోరి అన్నారు. ముడిసరకుల, లాజిస్టిక్స్ ఖర్చులు ఎగబాకిన దృష్ట్యా గృహోపకరణాల ధరలను పెంచినట్లు దక్షిణ కొరియా ఎలక్ట్రానిక్స్ ఉత్పత్తులు తయారీ సంస్థ ఎల్జీ తెలిపింది.
ఇవీ చూడండి:
Reliance buys Mandarin Oriental: రిలయన్స్ చేతికి న్యూయార్క్‌ హోటల్‌
