భారత్ బయోటెక్, ఐసీఎంఆర్ సంయుక్తంగా అభివృద్ధి చేసిన కొవాగ్జిన్ టీకా కాల పరిమితిని 12 నెలలకు పెంచింది సీడీఎస్సీఓ(సెంట్రల్ డ్రగ్స్ స్టాండర్డ్ కంట్రోల్ ఆర్గనైజేషన్). టీకా స్థిరత్వానికి సంబంధించి అదనపు సమాచారాన్ని పరిశీలించిన అనంతరం ఈమేరకు ఆమోదం తెలిపింది. దీంతో టీకాను తయారు చేసిన తేదీ నుంచి 12 నెలల వరకు ఉపయోగించుకునే వీలుంటుంది.
భారత్ బయోటెక్ ఈ విషయాన్ని అధికారిక ప్రకటనలో తెలిపింది. సంబంధిత వర్గాలకు దీనిపై సమాచారం ఇచ్చినట్లు పేర్కొంది.
కొవాగ్జిన్ టీకాను భారత్ సహా అనేక దేశాలు వినియోగిస్తున్నాయి. ప్రపంచ ఆరోగ్య సంస్థ అత్యవసర వినియోగ అనుమతి కోసం సంస్థ ఇప్పటికే ధరఖాస్తు చేసింది. ఈ విషయంపై డబ్ల్యూహెచ్ఓ సాంకేతిక సలహా బృందం అతి త్వరలో నిర్ణయం తీసుకోనుంది.
కొవాగ్జిన్ టీకాతో కరోనా నుంచి 77.8శాతం, డెల్టా వేరియంట్ నుంచి 65.2శాతం రక్షణ లభిస్తుందని ఇప్పటికే పరీక్షల్లో తేలింది. భారత్లో కొవాగ్జిన్ టీకాతో పాటు, ఆస్ట్రాజెనెకా, సీరం సంస్థ అభివృద్ధి చేసిన కొవిషీల్డ్ టీకాను వినియోగిస్తున్నారు. ఇప్పటివరకు 107 కోట్లకుపైగా టీకా డోసులను దేశవ్యాప్తంగా పంపిణీ చేశారు.
ఇదీ చదవండి: మోదీ 'టార్గెట్ 2070'.. భారత్కు సాధ్యమేనా?
