ప్రత్యక్ష పన్ను వివాద పరిష్కార పథకం 'వివాద్ సే విశ్వాస్' ద్వారా ప్రభుత్వానికి ఇప్పటివరకు రూ.72,480 కోట్లు వచ్చాయని విశ్వసనీయ వర్గాలు వెల్లడించాయి. ఈ పథకం కింద ఈ నెల 17 వరకు రూ. 31,734 కోట్ల వివాద పన్ను డిమాండ్తో కలిపి మొత్తం 45,885 డిక్లరేషన్లు దాఖలయ్యాయి. ఈ పథకం కింద కేంద్ర ప్రభుత్వ రంగ కంపెనీలు(సీపీఎస్యూలు) కూడా లక్ష కోట్ల రూపాయల పన్ను వివాదాలను పరిష్కరించుకుంటున్నట్లు ఆ వర్గాలు తెలిపాయి.
కరోనా మహమ్మారి నేపథ్యంలో గత నెలలో ప్రభుత్వం ఈ పథకాన్ని 2021 మార్చి 31వరకు పొడిగించింది. అయితే డిక్లరేషన్లు మాత్రం ఈ ఏడాది ఆఖరులోపు దాఖలు చేయాలని షరతు విధించింది. ఈ పథకం కింద సీపీఎస్యూలు, పన్ను చెల్లింపుదార్లు కలిపి రూ.72,480 కోట్లు ఇప్పటివరకు చెల్లించారని సమాచారం. ఆదాయపు పన్ను విభాగం ఉన్నత స్థాయి సమీక్ష సమావేశంలో ఈ పథకం గురించి పన్ను చెల్లింపుదార్లకు సమాచారం అందించేందుకు ఇ-క్యాంపెయిన్ ప్రారంభించాలని నిర్ణయించారు.
ఇదీ చూడండి: 'వివాద్ సే విశ్వాస్' బిల్లుకు పార్లమెంట్ ఆమోదం
