సబ్బులు, యాంటీ బ్యాక్టీరియా లిక్విడ్ల తరహాలో శానిటైజర్లు సైతం 18 శాతం జీఎస్టీ పరిధిలోకి వస్తాయని కేంద్ర ఆర్థిక మంత్రిత్వ శాఖ స్పష్టం చేసింది.
హ్యాండ్ శానిటైజర్ల తయారీలో ఉపయోగించే రసాయనాలు, ప్యాకింగ్ మెటీరియల్స్ సహా ఇతర వస్తువులకు 18 శాతం జీఎస్టీ వర్తిస్తుందని వెల్లడించింది.
"శానిటైజర్లు, సబ్బులు, యాంటీ బాక్టీరియల్ ద్రావణాలు, డెటాల్ మొదలైన క్రిమిసంహారక మందులన్నీ 18 శాతం జీఎస్టీ రేటు పరిధిలో ఉంటాయి."
-కేంద్ర ఆర్థిక శాఖ ప్రకటన
శానిటైజర్లపై జీఎస్టీ తగ్గించడం వల్ల దేశీయ తయారీదారులతో పాటు దిగుమతిదారులపై ప్రతికూల ప్రభావం పడుతుందని ఆర్థిక శాఖ పేర్కొంది. జీఎస్టీ రేట్లు తక్కువగా ఉంటే విదేశాల నుంచి దిగుమతులు పెరుగుతాయని... ఇది 'ఆత్మనిర్భర్ భారత్' విధానానికి వ్యతిరేకమని వివరించింది.
ఆల్కహాల్ ఆధారిత శానిటైజర్లు 18 శాతం స్లాబులోకి వస్తుందని అథారిటీ అడ్వాన్స్ రూలింగ్(ఏఏఆర్) గోవా బెంచ్ సైతం ఇటీవల స్పష్టం చేసింది.
