ఆతిథ్యానికి రూ.50,000 కోట్ల నిధి!

కరోనా వైరస్‌ వల్ల తీవ్రంగా నష్టపోయిన పర్యాటక, ఆతిథ్య రంగాలను ఆదుకోడానికి రూ.50,000 కోట్లతో నిధి ఏర్పాటు చేయాలని భారత పర్యాటక, ఆతిథ్య రంగాల పరిశ్రమల సమాఖ్య (ఫెయిత్‌) కేంద్ర ప్రభుత్వానికి సూచించింది. దేశీయంగా ఏప్రిల్‌- జులై మంచి పర్యాటక సీజన్‌ కాగా, ఈ మొత్తాన్ని కోల్పోయినట్లేని సమాఖ్య ఆందోళన వ్యక్తం చేసింది.

పర్యాటక, ఆతిథ్య రంగాలను ఆదుకోవాలని భారత పర్యాటక, ఆతిథ్య రంగాల పరిశ్రమల సమాఖ్య (ఫెయిత్‌) కేంద్ర ప్రభుత్వానికి సూచించింది. పరిశ్రమను ఆదుకునేందుకు ప్రత్యేక నిధి నెలకొల్పడంతో పాటు పదేళ్ల కాలానికి వడ్డీలేని రుణాలు ఇవ్వాలని, రుణ వాయిదాల చెల్లింపుపై మారటోరియాన్ని 3 నెలల నుంచి 2020-21 ఆర్థిక సంవత్సరం మొత్తానికి వర్తింపజేయాలని విజ్ఞప్తి చేసింది. ఆయా రాష్ట్ర ప్రభుత్వాలు మద్దతు చర్యలు చేపట్టాలని పేర్కొంది.

హోటల్‌ పరిశ్రమకు రూ.90,000 కోట్ల నష్టం

దేశంలో హోటల్‌ పరిశ్రమకు ఈ కేలండర్‌ ఏడాదిలో రూ.90,000 కోట్ల మేరకు నష్టం వాటిల్లనుందనే అంచనాను ఆతిథ్య రంగంలో కన్సల్టెన్సీ సేవలు అందించే హెచ్‌వీఎస్‌- అనరాక్‌ తాజా నివేదికలో పేర్కొంది. ‘లాక్‌డౌన్‌’ వల్ల రాకపోకలు నిలిచిపోయి కార్యకలాపాలు కొనసాగించలేనందున, సంఘటిత రంగంలోని హోటళ్లకు అధిక నష్టం జరుగుతోందని విశ్లేషించింది. ఈ ఏడాది మార్చిలో దేశంలోని ప్రధాన నగరాల్లోని హోటళ్లలో ‘ఆక్యుపన్సీ నిష్పత్తి’ 53 శాతం తగ్గినట్లు వివరించింది.