డిసెంబర్ 24 వరకు మొత్తం 3.97 కోట్ల మంది ఐటీ రిటర్నులు దాఖలు చేసినట్లు ఆదాయ పన్ను శాఖ వెల్లడించింది. ఇంకా ఎవరైనా మిగిలి ఉంటే ఈనెల 31లోగా ఆ ప్రక్రియ పూర్తి చేయాలని సూచించింది. 2019-20 ఆర్థిక సంవత్సరానికి దాఖలైన ఐటీఆర్లకు సంబంధించిన వివరాలను ఈమేరకు ట్విట్టర్ వేదికగా తెలిపింది.
మొత్తం 3.97 కోట్ల మందిలో ఐటీఆర్-1కు 2.27 కోట్ల మంది, ఐటీఆర్-4కు 85.20 లక్షల మంది, ఐటీఆర్-3కి 46.78 మంది, ఐటీఆర్-2కి 28.74మంది దరఖాస్తు చేసుకున్నట్లు ఆదాయ పన్ను శాఖ పేర్కొంది.
2019-20 ఆర్థిక సంవత్సరానికి ఐటీఆర్ దాఖలు చేసేందుకు ఈనెల 31 వరకు గడవుంది. ఆడిటింగ్ నిర్వహించాల్సిన పన్ను చెల్లింపుదారులకు వచ్చే ఏడాది జనవరి 31 వరకు అవకాశం ఉంది. కరోనా నేపథ్యంలో ఐటీఆర్ గడువును జులై 31 నుంచి డిసెంబర్ చివరి వరకు పొడిగించింది కేంద్రం.
2018-19 ఆర్థిక సంవత్సారానికి ఆలస్య రుసుం లేకుండా మొత్తం 5.65 కోట్ల ఐటీ రిటర్నులు దాఖలైనట్లు ఆదాయ పన్ను శాఖ తెలిపింది.
గతేడాది ఆగస్టు 31వరకు 3.92 కోట్ల మంది ఐటీఆర్ దాఖలు చేయగా, ఈ ఏడాది డిసెంబర్ 24 వరకు 3.97 కోట్ల మంది ఐటీఆర్ ఫైల్ చేసినట్లు వెల్లడించింది.
