శరవేగంగా ప్రజావేదిక కూల్చివేత... సగానికి పైగా పూర్తి

ప్రజావేదిక కూల్చివేయాలని ఆంధ్రప్రదేశ్ ముఖ్యమంత్రి జగన్ నిర్ణయం తీసుకున్న కొద్ది గంటల్లోనే అధికారులు పనులు ప్రారంభించారు. ఐఏఎస్, ఐపీఎస్ అధికారులతో రెండో రోజు సమీక్ష ముగిసిన వెంటనే కూల్చివేత పనులను శరవేగంగా జరుపుతున్నారు.

సీఆర్డీఏ ఉన్నతాధికారులు, ఇంజినీర్ల సమక్షంలో ప్రజావేదిక భవన కూల్చివేత ప్రక్రియ కొనసాగుతోంది. వందమంది కూలీలు, జేసీబీలు, ఇతర వాహనాలతో కూల్చివేత పనులు శరవేగంగా జరుగుతున్నాయి. ఫర్నీచర్, ఏసీలు, మైకులు, ఎలక్ట్రానిక్‌ సామగ్రిని నిన్న సాయంత్రమే తరలించారు. భవనంలో ఉన్న సామగ్రిని సచివాలయానికి తరలించారు. అక్కడి పూలకుండీలను హైకోర్టు సమీపంలోని నర్సరీకి పంపించారు. పనులు వేగవంతంగా జరుగుతున్నాయి. ఇప్పటికే సగానికిపైగా ప్రజావేదిక కూల్చివేత పనులు పూర్తయ్యాయి.

ఎలాంటి సమస్య రాకుండా అధికారులు ముందస్తు జాగ్రత్తలు తీసుకున్నారు. చంద్రబాబు కూడా విదేశాల నుంచి ఉండవల్లిలోని తన నివాసానికి చేరుకున్న నేపథ్యంలో ఎలాంటి అవాంఛనీయ సంఘటనలు జరగకుండా ప్రజావేదిక పరిసరాల్లో భారీ బందోబస్తు ఏర్పాటు చేశారు.

ఇవీ చూడండి: నూతన అసెంబ్లీ భూమి పూజ కోసం ఏర్పాట్లు