\
రాష్ట్రంలోని 54.60 లక్షల మంది రైతులకు పట్టాదారు పాసు పుస్తకాలు అందజేసినట్లు రెవెన్యూ శాఖ తెలిపింది. మరికొందరికి పాసు పుస్తకాలు ఇవ్వడానికి తహసీల్దార్లు డిజిటల్‌ సంతకం చేశారని, వీరి బ్యాంకు ఖాతా వివరాలను రైతుబంధు పోర్టల్‌లో అప్‌లోడ్‌ చేయాలని ఏఈఓలకు ఆదేశాలిచ్చింది.
ఎకరాకు ఐదు వేల రూపాయలు
ఇప్పటివరకు కేవలం 13 లక్షల మంది రైతుల ఖాతాల వివరాలను మాత్రమే ఏఈఓలు ఆన్‌లైన్‌లో అప్‌లోడ్‌ చేశారు. వీరిలో 8 లక్షల మంది ఖాతాల్లో వ్యవసాయశాఖ నేరుగా రూ.790 కోట్లను జమచేసింది. గతేడాది 4 లక్షల మంది రైతులు తమ బ్యాంకు ఖాతా వివరాలను ఇవ్వలేదు. ఈసారి కూడా వారి వివరాలు ఇప్పటివరకు అందలేదు. ఫలితంగా గత యాసంగిలో డబ్బు జమ అయిన రైతుల ఖాతాలకే ప్రస్తుతం ఎకరానికి రూ.5 వేల చొప్పున జమ చేస్తున్నామని ఆ శాఖ అధికారులు తెలిపారు. వారితోపాటు కొత్త పాసుపుస్తకాలు అందిన రైతుల వివరాలు కూడా పంపాలని తాజాగా ఏఈఓలను ఆదేశించారు.
ఏఈఓలకు సందేహాలు...
రైతుల వివరాలను అప్‌లోడ్‌ చేసే విషయంలో ఏఈఓలలో స్పష్టత కొరవడిందని, అందుకే వివరాలు వేగంగా ఆన్‌లైన్‌లోకి వెళ్లడం లేదనే విమర్శలు వెల్లువెత్తుతున్నాయి. వ్యవసాయశాఖ మార్గదర్శకాల ప్రకారం తొలుత ఏఈఓ రైతుల వివరాలను అప్‌లోడ్‌ చేయాలి. మండల స్థాయిలో ఉండే వ్యవసాయాధికారి(ఏఓ) వాటిని తనిఖీ చేసి ఆమోదించాక ఆన్‌లైన్‌లో నమోదవుతుంది. వాటిని జిల్లా వ్యవసాయాధికారి కార్యాలయంలో ఉండే రైతుబంధు నోడల్‌ అధికారి పరిశీలించి సొమ్ము విడుదల చేస్తారు. ఇలా సొమ్ము విడుదలకు అనుమతించిన రైతుల వివరాలను నోడల్‌ అధికారి తిరిగి ఏఈఓలకు పంపుతారు. మరోసారి బ్యాంకు ఖాతా సంఖ్యలను తనిఖీ చేయాల్సిందిగా సూచిస్తారు. ఇక్కడే గందరగోళం ఏర్పడుతోంది.
ఆన్‌లైన్‌లో పూర్తి వివరాలను అప్‌లోడ్‌ చేయాలి
‘‘గత యాసంగిలో 44 లక్షల మంది రైతులకే రైతుబంధు సొమ్ము బదిలీ అయింది. ఆ తరవాత మరో 10 లక్షల మంది రైతులకు పట్టాదారు పాసుపుస్తకాలు అందినందున వారి వివరాలు ఇప్పుడు ఏఈఓలు అప్‌లోడ్‌ చేయాలి. లేకపోతే వారికి సొమ్ము రాదు. అందుకే అన్నీ వివరాలు ఆన్‌లైన్‌లో అప్‌లోడ్‌ చేయాలని ఏఈఓలకు తాజాగా స్పష్టమైన ఆదేశాలు ఇచ్చామని వ్యవసాయ కమిషనర్ రాహుల్‌బొజ్జా ‘తెలిపారు. రైతుబంధు రాకపోతే ఏఓను సంప్రదించాలని..అక్కడా సమస్య పరిష్కారం కాకపోతే జిల్లా నోడల్‌ అధికారికి ఫిర్యాదు చేయాలని కమిషనర్ సూచించారు.
ఇవీ చూడండి : '32 సాధించి కొత్త చరిత్ర సృష్టించాం'
