నేడు మూడు సభల్లో పాల్గొననున్న రాహుల్

నేడు మూడు బహిరంగ సభల్లో పాల్గొననున్నారు కాంగ్రెస్ అధినేత రాహుల్​గాంధీ. లోక్​సభ ఎన్నికల షెడ్యూల్ విడుదలైన తర్వాత మొదటిసారి ప్రచారానికి వస్తున్నారు. ఎంపీ అభ్యర్థులకు రాహుల్ దిశానిర్దేశం చేయనున్నారు.

నేడు కాంగ్రెస్ నిర్వహించనున్న మూడు ప్రచార సభల్లో ఏఐసీసీ అధ్యక్షుడు రాహుల్‌ గాంధీ పాల్గొననున్నారు. ఆంధ్రప్రదేశ్‌, కర్ణాటకలో ప్రచారంలో పాల్గొన్న ఆయన ఆదివారం రాత్రి 10.30 గంటలకు హైదరాబాద్​ చేరుకున్నారు. శంషాబాద్ విమానాశ్రయంలో హస్తం నేతలు రాహుల్​కు స్వాగతం పలికారు.

ఈరోజు ఉదయం తాజా రాజకీయ పరిస్థితులపై రాష్ట్ర నాయకులతో రాహుల్ మాట్లాడనున్నారు. 17 లోక్​సభ స్థానాల్లో జరుగుతున్న ప్రచారాలు, అక్కడ ప్రత్యర్థి వర్గాల నుంచి ఎదురవుతున్న పోటీ, గెలుపునకు అవకాశం ఉన్న స్థానాలు తదితర అంశాల గురించి అడిగి తెలుసుకుంటారు.

ఉదయం 11.00 గంటలకు శంషాబాద్‌ విమానాశ్రయం నుంచి బయల్దేరి.. 11.35 గంటలకు జహీరాబాద్‌ చేరుకుంటారు. అనంతరం బహిరంగ సభలో ప్రసంగిస్తారు. అక్కడ నుంచి మధ్యాహ్నం 12.45కి బయలుదేరి 1.45 గంటలకు వనపర్తి సభలో పాల్గొంటారు. అక్కడ నుంచి 2.50 గంటలకు బయలుదేరి హుజూర్​నగర్‌ సభకు సాయంత్రం 4.05 గంటల వరకు చేరుకుంటారని పీసీసీ అధ్యక్షుడు ఉత్తమ్​కుమార్​రెడ్డి తెలిపారు. సాయంత్రం 6 గంటలకు శంషాబాద్‌ విమానాశ్రయానికి చేరుకుని ప్రత్యేక విమానంలో దిల్లీ బయలుదేరి వెళ్తారు.

ఇవీ చూడండి:'అధికారంలోకి వచ్చిన వెంటనే పసుపు బోర్డు'