Elderly Woman Abandoned Alive At Cemetery : పిల్లలు పుట్టిన తర్వాత తల్లిదండ్రులు వారే సర్వస్వంగా, కడవరకు చూస్తారని నమ్ముతారు. తమ పిల్లలకు ఏ ఆపదా రాకుండా కంటికి రెప్పలా వారి బాగోగులు చూసుకుంటారు. వారికి ఏ చిన్నకష్టం వచ్చినా సరే కన్నవారు ప్రాణం పోయేంతలా విలవిలలాడిపోతారు. తీరా వారు పెద్దయిన తర్వాత అమ్మనాన్నాలే అవసరం లేదని చెప్పేసిన కుమారులు, కుమార్తెలు కూడా ఈ లోకంలో ఉన్నారు.
కన్నవాళ్ల నుంచి ఆస్తులు కావాలి, కానీ కన్నవారు మాత్రం అవసరం లేదు. వారిని పెంచి పెద్ద చేసిన పాపానికి చివరికి ఆ తల్లిదండ్రులకు వృద్ధాప్యంలో కనీసం తిండి కూడా పెట్టడం లేదు. ఇలాంటి ఘటనే జగిత్యాలలో జరిగింది. నలుగురు కుమారులు ఉన్నప్పటికీ తల్లిని శ్మశానంలో వదిలేసిన అమానవీయ ఘటన జగిత్యాల పట్టణంలో చోటుచేసుకుంది.
ఇదీ జరిగింది : బాధితురాలు, స్థానికులు తెలిపిన వివరాల ప్రకారం, జగిత్యాలకు చెందిన రాజవ్వ అనే వృద్ధురాలికి నలుగురు కుమారులు ఉన్నారు. అయితే తన యోగక్షేమాలను కుమారులు పట్టించుకోవడం లేదని ఆమె ఆవేదన వ్యక్తం చేశారు. పింఛన్ డబ్బుల కోసమని తన కుమారుడు చితకబాదినట్లుగా బాధితురాలు తెలిపారు. గత ఎనిమిది రోజులుగా జగిత్యాల పట్టణంలోని మోతె శ్మశాన వాటికలో ఆమె ఉంటున్నట్లుగా గుర్తించిన వయోవృద్ధుల సంక్షేమ శాఖ అధికారులు ఆమె వద్దకు వెళ్లి వివరాలను సేకరించి ఆసుపత్రికి తరలించారు. ఈ విషయమై వయోవృద్ధుల సంక్షేమాధికారి నరేశ్ స్పందించారు. చట్టం ప్రకారం తగు చర్యలు తీసుకుంటామని తెలిపారు.
వేడి అన్నం పెట్టమన్నందుకు ఆ కుమారులు తండ్రిని ఏం చేశారో చూడండి?
'నువ్వు బతికుంటే నాకు పెళ్లి జరగదు - అందుకే చచ్చిపో' - తండ్రిని హతమార్చిన తనయుడు
