ఓటు హక్కు వినియోగించుకున్న రాష్ట్ర మంత్రులు

లోక్​సభ ఎన్నికలు తెలంగాణలో ప్రశాంతంగా ముగిశాయి. ఉదయం నుంచి రాష్ట్రంలో ఏ పోలింగ్​ కేంద్రంలో చూసినా ఓట్ల పండుగ కనిపించింది. రాష్ట్ర మంత్రులు తమ కుటుంబ సభ్యులతో కలిసి వెళ్లి వారి వారి నియోజక వర్గాల్లో ఓటు హక్కును వినియోగించుకున్నారు.

రాష్ట్ర మంత్రులు వారి వారి నియోజకవర్గాల్లో ఓటు హక్కును వినియోగించుకున్నారు. తమ పార్టీకి చెందిన అభ్యర్థుల గెలుపుపై ధీమా వ్యక్తం చేశారు. ప్రజాస్వామ్యంలో ఓటు ప్రజల చేతిలో వజ్రాయుధమని అందరూ విధిగా ఓటు వేయాలని సూచించారు.

మంత్రి ఈటల

రాష్ట్ర వైద్య ఆరోగ్య శాఖ మంత్రి ఈటల రాజేందర్‌ వరంగల్‌ అర్బన్‌ జిల్లా కమలాపూర్‌లో ఓటు హక్కు వినియోగించుకున్నారు. కుటుంబ సభ్యులతో కలిసి వచ్చి ఓటు వేశారు.

సికింద్రాబాద్​లో తలసాని

సికింద్రాబాద్ మారెడ్​పల్లిలోని కస్తూర్బా గాంధీ కళాశాలలో మంత్రి తలసాని ఓటు వేశారు. ప్రజాస్వామ్యంలో ఓటు కీలకమని అన్నారు.

45 ఏళ్లుగా ఓటేస్తున్నా: మంత్రి ఎర్రబెల్లి

పంచాయతీ రాజ్ శాఖ మంత్రి ఎర్రబెల్లి దయాకర్ రావు తన స్వగ్రామం వరంగల్ గ్రామీణ జిల్లా పర్వతగిరి మండల కేంద్రంలోని 255 పోలింగ్ కేంద్రం లో తన ఓటు హక్కును వినియోగించుకున్నారు. ఆయన సతీమణి ఉషతో కలిసి వచ్చి ఓటేశారు. గత 45 ఏళ్లుగా ఓటేస్తున్నానన్నారు.

ఇలా అయితే ఎలా..?: మంత్రి శ్రీనివాస్​ గౌడ్​

ఓటు వేసేందుకు గుర్తింపు కార్డు తప్పనిసరనే అంశాన్ని ప్రజల్లోకి తీసుకెళ్లటంలో ఎన్నికల సంఘం విఫలమైందని మంత్రి శ్రీనివాస్ గౌడ్ విమర్శించారు. మహబూబ్ నగర్ జిల్లా కేంద్రంలోని ముదిరాజ్ భవన్​లో ఆయన కుటుంబ సభ్యులతో కలిసి వచ్చి ఓటు వేశారు.

మే 23న దేశ భవిష్యత్తు: మంత్రి ఇంద్రకరణ్ రెడ్డి

దేవాదాయ, అటవీ, న్యాయ శాఖ మంత్రి ఇంద్రకరణ్ రెడ్డి నిర్మల్ మండలం ఎల్లపల్లిలో ఓటు వేశారు. కుటుంబ సభ్యులతో కలిసి వచ్చి ఓటు హక్కు వినియోగించుకున్నారు. మే 23న దేశ రాజకీయ భవిష్యత్తు తెలుస్తుందన్నారు.

సూర్యాపేటలో ఓటేసిన జగదీశ్​

ప్రజలంతా విధిగా ఓటేసి ప్రజాస్వామ్య లక్ష్యాలను కాపాడాలని రాష్ట్ర విద్యాశాఖ మంత్రి గుంట కండ్ల జగదీశ్ రెడ్డి అన్నారు. సూర్యాపేట జిల్లా కేంద్రానికి సతీ సమేతంగా వచ్చి ఓటు హక్కు వినియోగించుకున్నారు.

అందరిలాగానే మంత్రి మల్లారెడ్డి

సికింద్రాబాద్ బోయినపల్లిలోని సెయింట్ పీటర్స్ పాఠశాలలో కార్మిక శాఖ మంత్రి మల్లారెడ్డి ఓటు హక్కు వినియోగించుకున్నారు. అందరితో పాటే సతీ సమేతంగా క్యూలైన్లో వచ్చి ఓటు వేశారు.

స్వగ్రామంలో ఓటేసిన మంత్రి వేముల

రాష్ట్ర గృహనిర్మాణ, రోడ్డు రవాణా శాఖ మంత్రి వేముల ప్రశాంత్ రెడ్డి సతీసమేతంగా ఓటు హక్కు వినియోగించుకున్నారు. స్వగ్రామం వేల్పూర్​లోని జిల్లా పరిషత్​ ఉన్నత పాఠశాలలో ఓటు వేశారు.

వనపర్తిలో మంత్రి నిరంజన్​ రెడ్డి

రాష్ట్ర వ్యవసాయశాఖ మంత్రి నిరంజన్ రెడ్డి వనపర్తి జిల్లాలోని బాలుర జూనియర్ కళాశాలలో 116వ పోలింగ్ బూత్ లో ఓటేశారు. ఎన్నికల్లో ఓటే ముఖ్య భూమిక పోషిస్తుందన్నారు.

గోదావరిఖనిలో కొప్పుల ఈశ్వర్​

సంక్షేమ శాఖ మంత్రి కొప్పుల ఈశ్వర్​ గోదావరిఖని నియోజక వర్గంలో ఓటు హక్కు వినియోగించుకున్నారు. పోలింగ్​ కేంద్రంలోని ఓటింగ్​ సరళిని పరిశీలించారు.

ఓటేసిన హోంమంత్రి

రాష్ట్ర హోం మంత్రి మహమూద్​ అలీ హైదరాబాద్​ నియోజక వర్గంలో ఓటు హక్కు వినియోగించుకున్నారు.

ఇదీ చదవండి: ముగిసిన తెలంగాణ లోక్​సభ ఎన్నికల పోలింగ్