చలికాలంలో అద్దిరిపోయే "కళ్యాణ రసం"- వేడివేడి అన్నంలో అమృతమే!

- నోరూరించే సరికొత్త రసం - ఈ తమిళనాడు స్టైల్​​ రసంతో భోజన ప్రియులకు పండగే

How to Make Kalyana Rasam Recipe : చలికాలంలో ఏ ఆహారమైనా వేడివేడిగా తింటే.. ఎంతో హాయిగా ఉంటుంది. అందుకే చాలా ఇళ్లలో వేడివేడి అన్నంలో రసం తినడానికి ఆసక్తి చూపిస్తారు. రసంతో తినడం వల్ల ఆహారం సులభంగా జీర్ణమవుతుందని భావిస్తారు. అందుకే.. దాదాపు అందరి ఇళ్లలో టమాటా, మిరియాల రసం చేస్తుంటారు​. కానీ, ఎప్పుడూ వీటితోనే తినాలంటే బోర్​ అనిపిస్తుంది. అందుకే మీకు కొత్త రసం రెసిపీ పరిచయం చేయబోతున్నాం. అదే తమిళనాడు స్టైల్​​ "కళ్యాణ రసం". ఒక్కసారి ఇక్కడ చెప్పిన విధంగా రసం చేస్తే టేస్ట్​ అద్దిరిపోతుంది. ఈ రసంతో పిల్లలు పెద్దలందరూ ఇష్టంగా భోజనం చేస్తారు. మరి, ఇక ఆలస్యం చేయకుండా కమ్మటి కళ్యాణ రసం ఎలా చేయాలో ఇప్పుడు చూద్దాం..

కావాల్సిన పదార్థాలు:

• కందిపప్పు - కప్పు
• ఎండుమిర్చి - 4
• టమాటా - 1
• చింతపండు - పెద్ద నిమ్మకాయ సైజంత
• మిరియాలు - టీస్పూన్
• వెల్లుల్లి రెబ్బలు - 8
• నూనె - 2 టేబుల్​ స్పూన్లు
• ఆవాలు - టీస్పూన్​
• పసుపు - అర టీస్పూన్​
• ఉప్పు - రుచికి సరిపడా
• వాటర్​ సరిపడా
• కరివేపాకు -4 రెమ్మలు
• కొత్తిమీర తరుగు - కొద్దిగా
• ఇంగువు - పావు టీస్పూన్​

తయారీ విధానం:

• ముందుగా​ కందిపప్పును శుభ్రంగా కడిగి కుక్కర్లో వేసుకోండి. ఇందులో రెండు గ్లాసుల నీరు, కొద్దిగా పసుపు, ఉప్పు వేసి 3 విజిల్స్​ వచ్చే వరకు మెత్తగా ఉడికించుకోండి. ఆపై పప్పుని మెదుపుకుని ఒక గిన్నెలోకి తీసుకోండి.
• అలాగే టమాటా సన్నని ముక్కలుగా కట్​ చేసుకోండి.
• ఆ తర్వాత మిరియాలు, వెల్లుల్లి రెబ్బలను మిక్సీలో వేసి కాస్త బరకగా గ్రైండ్​ చేసుకోండి.
• అలాగే చింతపండు కొద్దిసేపు నీటిలో నానబెట్టి.. చింతపండు రసం రెడీ చేసుకోండి.
• ఇప్పుడు స్టవ్​ ఆన్​ చేసి పాన్​ పెట్టి ఆయిల్​ వేసి వేడి చేసుకోవాలి. నూనె వేడెక్కిన తర్వాత ఆవాలు వేసి వేపండి.
• ఆ తర్వాత కొద్దిగా పసుపు, ఎండుమిర్చి ముక్కలు మంచి సువాసన వచ్చే వరకు ఫ్రై చేసుకోవాలి.
• అనంతరం టమాటా ముక్కలు, రుచికి సరిపడా ఉప్పు వేసి బాగా కలపాలి.
• స్టవ్​ సిమ్​లో పెట్టి ముక్కలు మెత్తగా ఉడికించుకోవాలి.
• టమాటాలు మెత్తగా అయ్యాక.. ఉడికించుకున్న పప్పు వేసి బాగా కలపండి. ఇప్పుడు పావు లీటర్​ నీళ్లు పోసి మూత పెట్టి.. మీడియం ఫ్లేమ్​ మీద ఓ పొంగు వచ్చే వరకు మరిగించాలి.
• రసం మరుగుతున్నప్పుడు చింతపండు రసాన్ని పోసి మిక్స్ చేయాలి. అనంతరం కరివేపాకులు, గ్రైండ్​ చేసిన మిరియాలు, వెల్లుల్లి మిశ్రమం వేసి కలపండి.
• ఇప్పుడు కాస్త కొత్తిమీర తరుగు వేసి స్టవ్​ మీడియం ఫ్లేమ్​ మీద ఉంచి ఓ పొంగు వచ్చేవరకు మరిగించుకోవాలి.
• ఆ తర్వాత ఇంగువ వేసి మరో నిమిషం పాటు మరిగించి స్టవ్​ ఆఫ్​ చేయాలి. అంతే ఇలా సింపుల్​గా చేసుకుంటే ఘుమఘుమలాడే​ కళ్యాణ రసం రెడీ.
• ఈ రసంతో చలికాలంలో వేడివేడి అన్నం ఓ రెండు ముద్దలు ఎక్కువే తింటారు. నచ్చితే మీరూ ఓసారి ఇంట్లో ట్రై చేయండి.