ఆర్థిక సంక్షోభంలో కూరుకుపోయిన జెట్ ఎయిర్ వేస్ సంస్థ కోలుకునే పరిస్థితులు కనిపించటం లేదు. ఆ సంస్థకు వరుస కష్టాలు ఎదురవుతున్నాయి. బకాయిలు చెల్లించని కారణంగా బుధవారం టర్బైన్ ఫ్యూయల్ (ఏటీఎఫ్) సరఫరాను నిలిపేసిన ఇండియన్ ఆయిల్ కార్పొరేషన్ సంస్థ... సాయంత్రం తిరిగి పునరుద్ధరించింది.
" బుధవారం మధ్యాహ్నం 3 గంటల నుంచి దేశవ్యాప్తంగా జెట్ ఎయిర్వేస్కు ఇంధన సరఫరాను నిలిపేశాం. మా సంస్థతో చేసుకున్న బ్యాంకు గ్యారంటీ పరిమితులను ఉల్లంఘించిన నేపథ్యంలో చర్యలు తీసుకున్నాం." - ఐవోసీ.
జెట్ ఎయిర్వేస్కు ఇంధన సరఫరాను నిలిపేయటం వారంలో ఇది మూడోసారి.
సంస్థకు చెందిన బోయింగ్ విమానాన్ని ఆమ్‌స్టర్‌డామ్‌ విమానాశ్రయం వద్ద యూరోపియన్‌ కార్గో సర్వీసెస్‌ జప్తు చేసింది. జెట్ ఎయిర్‌వేస్‌లో వాటా కొనుగోలుకు ఆసక్తి ఉన్న వారు బిడ్లను దాఖలు చేసేందుకు గడువును శుక్రవారం వరకు పొడిగించారు రుణదాతలు. బుధవారమే ఈ గడువు ముగియాల్సి ఉంది.
జెట్ ఎయిర్వేస్ లీజులో 7 బోయింగ్ 737-800 విమానాలు ఉన్నాయి. వీటిని లీజుదారులు వెనక్కి తీసుకోవడానికి విమానయాన నియంత్రణ సంస్థ డీజీసీఏ అనుమతినిచ్చింది. ఈ నిర్ణయంతో విమానాలను దేశం నుంచి తీసుకెళ్లేందుకు, ఇతర సంస్థలకు అద్దెకు ఇచ్చుకునేందుకు అవకాశం లభించింది.
వీటికి తోడు 16 వేల మంది ఉద్యోగులకు మార్చి నెలలో జీతం అందలేదు. పైలట్లు, ఇంజినీర్లు, సీనియర్ మేనేజ్మెంట్ అధికారులు జీతాల బకాయిల చెల్లింపుపై సంస్థకు ఇదివరకే లీగల్ నోటీసులు అందించారు.
