Young Farmer Innovation : వర్షాభావ పరిస్థితులతో పంటలు నష్టపోయి ఆత్మహత్యలు చేసుకునే రైతులకు తన ఆవిష్కరణతో మార్గం చూపించాడో యువకుడు. మొక్కజొన్నతో పాటు నీటి శాతం ఎక్కువగా ఉండే మరో పదార్థంతో ఓ మిశ్రమాన్ని తయారు చేశాడు మహారాష్ట్ర జల్గావ్ జిల్లాలోని బ్రాహ్మణ్‌షెవ్‌గే గ్రామానికి చెందిన ప్రకాశ్ సునీల్ పవార్. దీని సాయంతో సుమారు రెండునెలల వరకు నీటి లభ్యత లేకున్నా పంటలు ఎండిపోకుండా కాపాడుకోవచ్చు.
45 నుంచి 60 రోజుల పాటు నీరు లేకపోయినా..
Crops Without Water : లేత ఆకుపచ్చ రంగులో ఉండే.. ఈ పేస్ట్ను మొక్కల వేర్ల పైభాగంలోని మట్టిలో కలపాలని ప్రకాశ్ చెబుతున్నాడు. ఇలా కలిపిన చోట.. 45 నుంచి 60 రోజుల పాటు నీరు లేకపోయినా పంటలు ఎండిపోకుండా ఉంటాయని వివరిస్తున్నాడు. రైతుల కోసం తాను చేసిన ఈ ఆవిష్కరణ ఉద్దేశం.. భారతీయ సంస్కృతిని రక్షించడానికే అంటున్నాడు ప్రకాశ్ పవార్.
"నేను చేసిన పరిశోధనతో పంటకు సుమారు రెండు నెలల వరకు నీరు అందించకపోయినా బతుకుతుంది. ఈ ఆవిష్కరణలో నేను విజయం సాధించాను. పైగా 20 ఏళ్ల వరకు నేను పేటెంట్ హక్కులను కూడా దక్కించుకున్నాను."
- ప్రకాశ్ సునీల్ పవార్, యువరైతు
20 ఏళ్లపాటు పేటెంట్ హక్కులు
ఈ ఆవిష్కరణపై 20 ఏళ్ల పాటు పేటెంట్ హక్కులను పొందాడు ప్రకాశ్. ఇది తనకు మరింత ప్రోత్సాహాన్ని ఇచ్చిందని సంతోషం వ్యక్తం చేస్తున్నాడు. ప్రకాశ్ చేసిన ఈ వినూత్న ఆవిష్కరణ రైతులకు ఎంతో ఉపయోగకరంగా ఉంటుందని అంటున్నారు గ్రామస్థులు. వ్యవసాయానికి సంబంధించి తమ కుమారుడు చేసిన ఈ కొత్త ప్రయోగం రైతుల ఆత్మహత్యలను తగ్గిస్తుందన్నారు ప్రకాశ్ పవార్ తల్లిదండ్రులు. అంతేకాకుండా పంట నష్టాలను నివారిస్తుందని ఆశాభావం వ్యక్తం చేస్తున్నారు.
"వ్యవసాయానికి సంబంధించి నా కుమారుడు చేసిన ఈ ఆవిష్కరణకు మేము చాలా గర్విస్తున్నాము. ఈ పరిశోధన రైతుల ఆత్మహత్యలను తగ్గించడమే కాకుండా పంట నష్టాలను నివారిస్తుంది. రైతుల కోసం ప్రకాశ్ పవార్ చేసిన ఈ ప్రయత్నం మరిన్ని సత్ఫలితాలను సాధిస్తుందని ఆశిస్తున్నాము."
- ప్రకాశ్ సునీల్ పవార్ తల్లిదండ్రులు
