Woman Raped In Tamilnadu: తమిళనాడులోని కడలూరులో బాయ్ఫ్రెండ్ కళ్లముందే యువతిపై సామూహిక అత్యాచారానికి పాల్పడ్డారు దుండగులు. అనంతరం యువతి బాయ్ఫ్రెండ్ సెల్ఫోన్ తీసుకుని పరారయ్యారు. బాధితురాలి ఫిర్యాదు మేరకు పోలీసులు కేసు నమోదు చేసి.. ముగ్గురు నిందితులను అరెస్ట్ చేశారు.
ఏమైందంటే..: కడలూరులోని కమ్మియమ్పెట్టాయ్లో బాధిత యువతి.. తన బాయ్ఫ్రెండ్తో నిర్మానుష్య ప్రాంతంలో ఉండగా.. అక్కడకు వచ్చిన ముగ్గురు యువకులు వారిని ఫొటోలు, వీడియోలు తీసి బెదిరించారు. అలా బాయ్ఫ్రెండ్ ఎదుటే యువతిపై సామూహిక అత్యాచారానికి పాల్పడ్డారు. అంతేకాక యువతి బాయ్ఫ్రెండ్ సెల్ఫోన్ను లాక్కున్నారు. ఈ విషయం ఎవరికీ చెప్పొద్దని బెదిరించి అక్కడి నుంచి పరారయ్యారు.
కమ్మియమ్పెట్టాయ్లో మార్చి 28న రాత్రిపూట గస్తీ నిర్వహించిన పోలీసులు.. యువతి బస్స్టాప్లో ఒంటరిగా ఉండటాన్ని గమనించి ప్రశ్నించగా.. ఈ వ్యవహారం వెలుగులోకి వచ్చింది. వెంటనే బాధితురాలిని చికిత్స నిమిత్తం కడలూరు ప్రభుత్వ ఆస్పత్రికి తరలించారు. ఆ తర్వాత గాలింపు చర్యలు చేపట్టి ముగ్గురు నిందితులు కిశోర్(19), సతీశ్(19), ఆరిఫ్(18)ను అరెస్ట్ చేశారు. నిందితుల మొబైల్ ఫోన్లను స్వాధీనం చేసుకున్నారు. డీఐజీ పాండియన్, కడలూరు డీఎస్పీ శక్తి గణేశ్.. ముగ్గురు యువకులను విచారిస్తున్నారు.
డేటింగ్ యాప్లో పరిచయమై..
బంగాల్కు చెందిన ఓ యువతిపై సామూహిక అత్యాచారానికి పాల్పడ్డారు దిల్లీకి చెందిన నలుగురు యువకులు. ఈ ఘటన బెంగళూరులో జరిగింది. దిల్లీకి చెందిన నలుగురు యువకులు రజత్, శివరామన్, దేవ్ సరోయ్,యోగేశ్కుమార్.. జాతీయ స్విమ్మింగ్ పోటీల శిక్షణ కోసం బెంగళూరు వచ్చారు. ఈ క్రమంలో రజత్కు డేటింగ్ యాప్లో ఓ యువతి పరిచయమైంది. ఆ తర్వాత వారంతా ఫ్రెండ్స్ అయ్యారు. ఈనెల 24 స్నేహితులంతా కలిసి పార్టీ చేసుకున్నారు. అర్ధరాత్రి కావడం వల్ల ఆ యువతి రజత్ గదిలోనే నిద్రపోయింది. ఈక్రమంలో ఆమెపై నలుగురు సామూహిక అత్యాచారానికి పాల్పడ్డారు. దీంతో ఆమె పోలీసులకు ఫిర్యాదు చేసింది. బాధితురాలి ఫిర్యాదు మేరకు నలుగురిని అరెస్ట్ చేశారు పోలీసులు.
ఇదీ చూడండి: 45 వెడ్స్ 25.. ఐదు నెలల క్రితం వైరల్.. ఇప్పుడు విషాదం.. పాపం ఆ అమ్మాయి...
