పొరుగింటి వేధింపులు.. కుమారుడితో కలిసి మహిళ ఆత్మహత్య

భర్త కరోనాతో మరణించాడు. దీంతో ఒంటరైన భార్యాపిల్లలను అదే అపార్ట్​మెంట్​లో ఉంటున్న కొంతమంది వేధించటం ప్రారంభించారు. ఈ వేధింపులు తాళలేక తన పదేళ్ల కుమారుడితో కలిసి ఆ మహిళ 12వ అంతస్తు నుంచి దూకి ఆత్మహత్య చేసుకుంది. ఈ ఘటన మహారాష్ట్రలో జరిగింది.

మహారాష్ట్ర ఛందివలీలో విషాదం జరిగింది. తులీపియా అపార్ట్​మెంట్స్​లో ఓ మహిళ తన పదేళ్ల కుమారుడితో కలిసి 12వ అంతస్తు నుంచి దూకి ఆత్మహత్య చేసుకున్నట్లు సకినాకా పోలీసులు తెలిపారు.

ఏం జరిగింది?

రేష్మ, సారత్​ ములుకుత్ల దంపతులు. వాళ్లు ఛందివలీలోని తులీపియా అపార్ట్​మెంట్స్​లో నివాసం ఉంటున్నారు. ఇటీవల సారత్​ కొవిడ్ బారిన పడి మృతిచెందాడు. దీంతో ఆ కుటుంబం ఒంటరైంది. పొరుగింట్లో ఉండే ఆయుబ్ ఖాన్​, షానాజ్ ఖాన్​, షాదాబ్ ఖాన్​లు ఆ కుటుంబాన్ని వేధించటం మొదలు పెట్టారు. వేధింపులు తాళలేక రేష్మ, ఆమె కుమారుడు గరుద్​(10)తో కలిసి 12 వ అంతస్తు నుంచి దూకి ఆత్మహత్య చేసుకుంది.

ఈ ఘటనపై పోలీసులు కేసు నమోదు చేశారు. రేష్మ సూసైడ్ నోట్ ఆధారంగా.. షాదాబ్​ ఖాన్​ను అరెస్ట్​ చేశారు.

ఇదీ చదవండి: Rape: ఏడాదిన్నర చిన్నారిని ఎత్తుకెళ్లి.. హత్యాచారం!