ప్రజలంతా ఒకే తాటిపైకి వస్తే ప్రభుత్వాలు మారిపోతాయని భారతీయ కిసాన్ యూనియన్ నాయకుడు రాకేశ్ టికాయిత్ తెలిపారు. హరియాణా సోనిపట్ జిల్లా ఖార్కొడాలో ఏర్పాటు చేసిన 'మహా పంచాయత్'లో ఆయన ఈ వ్యాఖ్యలు చేశారు. జనమంతా ఒకే దగ్గర గుమిగూడినంత మాత్రాన అది చట్టాల రద్దుకు దారితీయదని కేంద్ర వ్యవసాయ మంత్రి నరేంద్ర సింగ్ తోమర్ చేసిన వ్యాఖ్యలను ఆయన ఖండించారు.
'అధికారం కష్టం'
రైతు చట్టాలను రద్దు చేయకపోతే అధికారంలో కొనసాగటం కేంద్రానికి కష్టమవుతుందన్నారు టికాయిత్. కేంద్రం తమ డిమాండ్లను అంగీకరించేంత వరకూ ఉద్యమం కొనసాగుతుందన్నారు. రైతు చట్టాలతో పాటు విద్యుత్ చట్టం, విత్తన చట్టం, పెట్రోల్, డీజిల్ ధరలు పెరుగుదలు.. తదితర వాటిపై కేంద్రంపై విమర్శలు చేశారు టికాయిత్.
"సొంత పంటలను త్యాగం చేస్తున్న రైతులకు ప్రభుత్వాలు లెక్క కాదని తెలుసుకోవాలి. ఈ ఉద్యమం కేవలం రైతుల కోసం కాదు. పేదలు, రోజూ వారీ కూలీల కోసం కూడా. ఇలాంటి చట్టాలు పేద ప్రజల్ని ఇంకా పేదరికంలోకి నెట్టేస్తాయి. కనీస మద్దతు ధరపై చట్టం తీసుకొస్తేనే రైతుకు సంరక్షణ. ఈ ఉద్యమం రైతుల హక్కులను కాపాడేందుకే.. "
-- బీకేయూ నేత రాకేశ్ టికాయిత్
కేంద్ర వ్యవసాయ శాఖ మంత్రి నరేంద్ర సింగ్ తోమర్ గ్వాలియర్లో రైతు చట్టాలపై ఆదివారం మాట్లాడుతూ... రైతులతో చర్చలు జరిపేందుకు తాము సిద్ధమని అన్నారు. జనం గుమిగూడినంత మాత్రాన.. అది చట్టాలను రద్దు చేయటానికి దారితీయవన్నారు. కేంద్రం తీసుకొచ్చిన రైతు చట్టాల్లో... ఏ అంశం రైతులకు వ్యతిరేకంగా ఉందో రైతు సంఘాలు ప్రభుత్వానికి చెప్పాలని ప్రశ్నించారు.
ఇదీ చదవండి : 'దేశానికి వ్యవసాయమే ప్రధాన వ్యాపారం'
