Omicron's peak stage in India: ఒమిక్రాన్తో ప్రపంచ దేశాలు గడగడలాడుతున్నాయి. కరోనా కొత్త వేరియంట్తో ప్రపంచవ్యాప్తంగా మరణాల సంఖ్య పెరిగే అవకాశముందని ప్రపంచ ఆరోగ్య సంస్థ హెచ్చరించింది. భారత్లోనూ కేసులు రోజురోజుకు పెరుగుతున్నాయి. ఒమిక్రాన్ తీవ్రతతో పాటు ఇతర అంశాలపై ప్రముఖ వైరాలజిస్ట్ జాకబ్ జాన్.. ఈటీవీ భారత్తో మాట్లాడారు. ఆ వివరాలు..
ఒమిక్రాన్ వ్యాప్తిని ఎదుర్కొనేందుకు భారత్ సిద్ధమేనా?
భారత్ సిద్ధమే. కరోనా రెండు దశలను భారత్ ఎదుర్కొంది. సమస్యను ఏ విధంగా అధిగమించాలో రాష్ట్రాలకు అర్థమైంది. మూడో దశ కోసం రాష్ట్రాలు ముందే సన్నద్ధమయ్యాయి కదా.
దేశంలో ఒమిక్రాన్ కేసులు ఎప్పుడు తారస్థాయికి చేరతాయి?
గత నెలలో ఒమిక్రాన్.. దేశంలోకి వచ్చింది. దీని వ్యాప్తి తీవ్రంగా ఉంటుంది. అందువల్ల దేశంలో వచ్చే ఏడాది జనవరి, ఫిబ్రవరిలో కేసులు తీవ్రస్థాయికి చేరే అవకాశం ఉంది.
గత వేరియంట్లకు 7 రోజుల క్వారంటైన్ ఉంటుంది. కానీ ఒమిక్రాన్కు అది 14రోజులు. మరి నమోదయ్యే కేసులకు తగ్గట్టు.. దేశంలో సరిపడా పడకలు, వైద్య పరికరాలు అందుబాటులో ఉన్నాయా?
వాస్తవానికి.. తేలికపాటి లక్షణాలు ఉన్నవారికి హోం క్వారంటైన్ సరిపోతుంది. ఆసుపత్రుల్లో చేరాల్సిన అవసరం లేదు. 2022 ప్రథమార్థంలో కేసులు పెరిగితే.. అందుకు తగ్గట్టు పడకలు ఉన్నాయి. అయితే పిల్లలపైన ఎక్కువ దృష్టిపెట్టాలి. వారి కోసం ప్రత్యేక చర్యలు చేపట్టాలి. 7రోజుల క్వారంటైన్ తర్వాత ఆర్టీ-పీసీఆర్ పరీక్ష నిర్వహించవచ్చు. అందులో నెగిటివ్ వస్తే ఆ వ్యక్తిలో వైరస్ లేనట్టే. కచ్చితంగా 14రోజులు ఉండాల్సిన అవసరం లేదు.
Indian omicron news:
మరో వేవ్ వస్తే.. దేశంలో లాక్డౌన్ విధించాలా?
ఇంకో 'వేవ్' రావడం దాదాపు అసాధ్యం. కేసులు కొద్దిగా పెరుగుతాయని మేము అనుకుంటున్నాము. దేశ జనాభాలో ఇమ్యూనిటీ ఎక్కువగా ఉన్న తర్వాత ఒమిక్రాన్ వచ్చింది. పిల్లల్లో వ్యాధి సోకే అవకాశముంది. దానికి జాగ్రత్తలు తీసుకోవాలి. లాక్డౌన్ అవసరమే ఉండదు.
టీకా తీసుకోని వారిలో ఒమిక్రాన్ ప్రభావం ఏ స్థాయిలో ఉంటుంది?
ఈ విషయంపై ఇంకా స్పష్టత లేదు. టీకా తీసుకోని వారిలో చాలా మందికి కరోనా, డెల్టా సోకి ఉండొచ్చు. అందువల్ల టీకా తీసుకోని ప్రజలందరినీ ఒకే విధంగా చూడలేము. గర్భం, కేన్సర్, ఇతర వ్యాధులతో బాధపడుతున్న వారికి ముప్పు ఎక్కువగా ఉండే అవకాశముంది. టీకా పంపిణీని మరింత పెంచాలి. అందరూ రెండు డోసులు వేసుకునే విధంగా ప్రోత్సహించాలి. పిల్లలకు టీకాలు ఇవ్వాలి. అవసరమైతే బూస్టర్ డోసు కూడా తీసుకురావాలి.
omicron India latest news
ఒమిక్రాన్లో మ్యుటేషన్లు ఎక్కువ ఉన్నాయని అధ్యయనాలు చెబుతున్నాయి. దీని వల్ల నష్టం ఏమైనా ఉందా?
మ్యుటేషన్లు ఎక్కువగా ఉంటే రోగనిరోధక శక్తి నుంచి వైరస్ తప్పించుకునే ప్రమాదం ఎక్కువ ఉంటుంది. గతేడాది కొవిడ్ బారిన ప్రజలు, రెండో డోసు తీసుకుని ఆరు నెలలు దాటిపోయిన వారికి రక్షణ తగ్గుతుందని అనుకుంటున్నాము. అదే సమయంలో.. మ్యుటేషన్లు ఎక్కువగా ఉండేసరికి.. ఒమిక్రాన్ అంత ప్రమాదకరం కాకపోవచ్చని మేము భావిస్తున్నాము.
అసలు ఈ మహమ్మారి ఎప్పుడు అంతం అవుతుంది?
2019 డిసెంబర్ నుంచి 2020 ఏప్రిల్ మధ్య కాలంలో మహమ్మారి వివిధ దేశాలకు విస్తరించింది. మహమ్మారి అంతం కూడా అస్థిరంగానే ఉంటుంది. ఇప్పటికే భారత్, తైవాన్, జపాన్ మహమ్మారి ఎపిడమిక్ దశ ముగింపునకు చేరుకున్నాయి. ప్రస్తుతం ఎండెమిక్ (తక్కువ స్థాయిలో కేసులు ఉండటం) దశలో ఉన్నాయి. నా అంచనా ప్రకారం.. 2022 ప్రథమార్థం ముగిసే నాటికి.. మహమ్మారి అంతమవుతుంది. కానీ ఈ వైరస్ ఎండెమిక్లాగా(జలుబు, ఫ్లూ).. మనుషుల్లో ఉండిపోతుంది. టీకాలు వేసుకోవడం మాత్రం ముఖ్యం.
ఇదీ చూడండి:- దిల్లీలో పెరిగిన ఒమిక్రాన్ కేసులు
