బంగాల్లో భాజపా కార్యకర్త తల్లి మరణంపై తీవ్రస్థాయిలో రాజకీయ దుమారం రేగింది. అధికార టీఎంసీపై భాజపా తీవ్ర ఆరోపణలు చేయగా.. వాటిని సీఎం మమతా బెనర్జీ తిప్పికొట్టారు.
నిమ్తాలోని భాజపా కార్యకర్త గోపాల్ మజుమ్దార్ తల్లి శోభను గత నెలలో ఆసుపత్రిలో చేర్చారు. 85ఏళ్ల తన తల్లిపై ముగ్గురు టీఎంసీ కార్యకర్తలు దాడి చేశారని గోపాల్ పేర్కొన్నాడు. దాడి జరిగిన కొద్దిసేపటికి భాజపా నేత సువేందు అధికారి.. గోపాల్ నివాసానికి వెళ్లారు. శోభను ఆసుపత్రికి తరలించారు. కొద్ది రోజుల చికిత్స అనంతరం.. నాలుగు రోజుల క్రితం ఆమె ఇంటికి చేరారు. తాజాగా.. సోమవారం తెల్లవారుజామున ఆ వృద్ధురాలు ప్రాణాలు విడిచారు.
'మమతను వెంటాడుతుంది..'
గోపాల్ తల్లి మరణంపై కేంద్ర హోంమంత్రి అమిత్ షా స్పందించారు. ఆ తల్లి మరణం.. మమతను వెంటాడుతుందని మండిపడ్డారు.
"శోభాజీ మరణ వార్తను విని తీవ్ర వేదనకు గురయ్యాను. టీఎంసీ గూండాలు ఆమెను తీవ్రంగా కొట్టారు. ఆ నొప్పి, ఆమె కుటుంబసభ్యుల బాధ.. మమతను వెంటాడతాయి. బంగాల్లో అహింస కోసం భాజపా పోరాడుతుంది. బంగాల్ తల్లులు, సోదరీమణుల భద్రత కోసం భాజపా పోరాడుతుంది."
--- అమిత్ షా, కేంద్ర హోంమంత్రి.
'హాథ్రస్ మాటేంటి?'
అమిత్ షా తనపై చేసిన ఆరోపణలను తిప్పికొట్టారు మమతా బెనర్జీ. మహిళలపై హింసను తాను సహించబోనని తేల్చిచెప్పారు. భాజపా పాలిత ఉత్తర్ప్రదేశ్లో.. మహిళలు హింసకు గురై ప్రాణాలు కోల్పోతున్నారని, అమిత్ షా వారిని ఎందుకు పట్టించుకోరాని ప్రశ్నించారు.
"ఆ సోదరి(గోపాల్ తల్లి) ఎలా మరణించారో నాకు తెలియదు. మహిళలపై హింసకు మేము మద్దతివ్వము. ఈ విషయంపై భాజపా రాజకీయాలు చేస్తోంది. బంగాల్ పరిస్థితి ఏంటని అమిత్ షా ట్వీట్లు చేస్తున్నారు. మరి ఉత్తర్ప్రదేశ్ హాథ్రస్లో మహిళలపై జరిగిన పైశాచిక దాడిపై ఆయన ఎందుకు మౌనంగా ఉంటారు?"
--- మమతా బెనర్జీ, బంగాల్ ముఖ్యమంత్రి.
ఇదీ చూడండి:- మమతXసువేందు: నందిగ్రామ్లో మాటల తూటాలు
