బిహార్లోని ఛప్రా ప్రభుత్వ ఆస్పత్రిలో ఆశ్చర్యకరమైన సంఘటన వెలుగులోకి వచ్చింది. కిడ్నీ సమస్యతో ఆస్పత్రికి వచ్చిన ఓ వృద్ధుడికి అల్ట్రాసౌండ్ స్కానింగ్ తీయగా కడుపులో గర్భాశయం ఉన్నట్లు రిపోర్టులో వచ్చింది. ఈ రిపోర్ట్స్ చూసిన డాక్టర్లంతా షాక్కు గురయ్యారు.
ఇదీ జరిగింది..
ఛప్రాలోని కార్పెంటర్ మియాన్ అనే అరవై ఏళ్ల వృద్ధుడికి కిడ్నీ సమస్య వచ్చింది. దీంతో కుటుంబ సభ్యులు అతడిని సమీపంలో ఉన్న ప్రభుత్వ ఆస్పత్రికి తీసుకుని వెళ్లారు. దీంతో వైద్యులు అతడికి అల్ట్రాసౌండ్ స్కానింగ్ పరీక్ష నిర్వహించారు. అనంతరం రిపోర్ట్స్ చూసిన వైద్యులు షాక్కు గురయ్యారు. వృద్ధుడి కడుపులో గర్భాశయం ఉన్నట్లు ఆ స్కానింగ్ రిపోర్టులో వచ్చింది.
ఈ విషయం తెలుసుకున్న వృద్ధుడి కుటుంబ సభ్యులు తీవ్ర ఆందోళన చెందారు. రిపోర్టు చూసిన డాక్టర్లంతా ఈ సంఘటనకు ఆశ్చర్యపోయి.. అతడికి మళ్లీ వైద్య పరీక్షలు చేయించాలని సూచించారు. అనంతరం వృద్ధుడికి మరోసారి వైద్య పరీక్షలు చేయగా.. అతడి కడుపులో గర్భాశయం ఉన్నట్లు కనిపించలేదు. దీంతో వృద్ధుడి కుటుంబ సభ్యులు కాస్త ఊరట చెందారు.
ఈ విషయం పై మాట్లాడిన వైద్యులు రిపోర్ట్స్ తారుమారై ఉంటాయని తెలిపారు. ఇది కేవలం మానవ తప్పిదమే తప్ప స్కానింగ్లో ఎలాంటి పొరపాటు లేదని చెప్పారు. ఒక మహిళ సిటీ స్కాన్లో ఉన్న అంశాలన్నీ ఆ రిపోర్టులో ఉన్నాయని డాక్టర్లు తెలిపారు. "ఇది పూర్తిగా మానవ తప్పితదమే. ఆ రిపోర్టులో గర్భాశయం ఉన్నట్లు ఉంది. పురుషుడికి గర్భాశయం ఉంటే వైద్యం చేయటం సాధ్యం కాదు. రిపోర్ట్స్ మారిపోయి ఉండవచ్చు. అందుకే మేము మళ్లీ అతడికి స్కానింగ్ తీయించాము. తరువాత తీసిన స్కానింగ్లో వృద్ధుడికి గర్భాశయం ఉన్నట్లు కనిపించలేదు. ప్రస్తుతం ఆ రిపోర్ట్స్ విషయంలో ఏం జరిగిందో తెలుసుకునే పనిలో ఉన్నాము." అని డాక్టర్ సంతోష్ కుమార్ తెలిపారు.
ఇవీ చదవండి:
