దిల్లీలో భారత్, అమెరికా రక్షణ మంత్రుల అత్యున్నత స్థాయి సమావేశం శనివారం ముగిసింది. రక్షణ మంత్రులు రాజ్నాథ్ సింగ్, లాయిడ్ జేమ్స్ ఆస్టిన్ ఉన్నతాధికారులతో కలిసి భేటీ అయ్యారు. ఆస్టిన్తో అద్భుతమైన, ఫలప్రద చర్చలు జరిగాయని రాజ్నాథ్ పేర్కొన్నారు.
"ఆస్టిన్, ఆయన బృందంతో సమగ్రమైన భేటీ జరిగింది. ఎన్నో ద్వైపాక్షిక, బహుపాక్షిక ఒప్పందాలను సమీక్షించాం. ఎల్ఈఎంఓఏ, కామ్కాసా, బెకా ఒప్పందాలపై సంతకాలు చేశాం. భారత్-అమెరికా రక్షణ సంబంధాల బలోపేతానికి మరింత సహకరించుకోవాలని అంగీకరించాం. సైనిక విస్తరణ, సమాచార మార్పిడి, రవాణాలో పరస్పర సహకారం అందించాలని నిర్ణయించాం."
-రాజ్నాథ్ సింగ్, భారత రక్షణ మంత్రి
ఈ సమావేశానికి సీడీఎస్ జనరల్ బిపిన్ రావత్, త్రివిధ దళాల అధిపతులు కూడా హాజరయ్యారు.
వేగంగా మారుతున్న అంతర్జాతీయ పరిణామ క్రమంలో అమెరికాకు భారత్ కీలక భాగస్వామి అన్నారు లాయిడ్ ఆస్టిన్. తమ ఇండో పసిఫిక్ విధానంలో భాగంగా భారత్కు రక్షణ రంగంలో మరింత సహకారం అందిస్తామని తెలిపారు.
"ఇండో పసిఫిక్ ప్రాంత స్వేచ్ఛ, సుస్థిరతలో భారత్-అమెరికా బంధం పట్టుకొమ్మ వంటింది. స్వేచ్ఛా నౌకాయానం, విమానయానం, వాణిజ్యానికి మోదీ హామీ ఇచ్చారు. ప్రాంతీయ భద్రతకు ఇరు దేశాలూ కట్టుబడి ఉన్నాయి."
- లాయిడ్ ఆస్టిన్, అమెరికా రక్షణ మంత్రి
రాజ్నాథ్తో భేటీకి ముందు దిల్లీలోని యుద్ధ స్మారకం వద్ద అమర జవాన్లకు నివాళులు అర్పించారు ఆస్టిన్. అనంతరం విజ్ఞాన్ భవన్లో సైనికుల గౌరవ వందనం స్వీకరించారు.
మూడు రోజుల భారత పర్యటనలో ఉన్న ఆస్టిన్.. శుక్రవారమే భారత్ చేరుకున్నారు. తొలి రోజు ప్రధాని మోదీ సహా జాతీయ భద్రతా సలహాదారు అజిత్ ఢోబాల్తో ఆయన సమావేశయ్యారు.
ఇదీ చూడండి: మోదీతో అమెరికా రక్షణ మంత్రి భేటీ
