అలిగిన తన భార్యను బుజ్జగించేందుకు తనకు లీవ్ కావాలని ఓ కానిస్టేబుల్ ఏఎస్పీని కోరాడు. "పెళ్లై నెల రోజులు అవ్వకముందే భార్యను వదిలి వచ్చినందుకు ఆమె నాపై అలిగింది. నేను ఫోన్ చేసినా స్పందించడం లేదు. అందుకు నాకు సెలవులు కావాలి" అని ఉన్నతాధికారికి లేఖ రాశాడు ఉత్తర్ప్రదేశ్కు చెందిన ఆ కానిస్టేబుల్.
2016 బ్యాచ్కు చెందిన గౌరవ్ చౌదరి అనే కానిస్టేబుల్ మౌ జిల్లా నివాసి. ప్రస్తుతం మహారాజ్గంజ్ జిల్లాలోని నౌత్వానా పోలీస్స్టేషన్ పరిధిలో విధులు నిర్వర్తిస్తున్నాడు. గౌరవ్కు గతేడాది డిసెంబర్లో వివాహం జరిగింది. అనంతరం తన భార్యను ఇంటి వద్ద వదిలి విధులకు హాజరయ్యాడు. అయితే వెళ్తూ వెళ్తూ.. మేనల్లుడి పుట్టినరోజున వారం రోజులు సెలవు తీసుకుని వస్తానని భార్యకు హామీ ఇచ్చాడు. కానీ దానికి ముందుగానే అతడి భార్య తన ఫోన్కాల్స్కు స్పందించడం మానేసి తన చిరుకోపాన్ని చూపుతోంది.
తన బాధను వ్యక్తం చేస్తూ.. 7 రోజులు సెలవులు కోరుతూ డిపార్ట్మెంట్కు లేఖ రాశాడు గౌరవ్. అందులో.. "పెళ్లి అయిన తర్వాత ఇంటికి వెళ్లలేదు. అందుకు నా భార్య పదే పదే నా ఫోన్ కాల్ను కట్ చేస్తోంది. కొన్నిసార్లు ఆమె ఫోన్ రిసీవ్ చేసినా సరే.. మాట్లాడమని ఆమె తల్లికి ఇస్తోంది. అందుకే నాకు సెలవులు కావాలి" అని పేర్కొన్నాడు. అయితే కానిస్టేబుల్ బాధను అర్థం చేసుకొన్న ఏఎస్పీ అతీశ్ కుమార్ సింగ్.. 5రోజులు సెలవులు మంజూరు చేశారు. గౌరవ్ సెలవులు జనవరి 10న ప్రారంభం కానున్నాయి.
