ఉత్తర్ప్రదేశ్ ముజఫర్నగర్లో గత నెల 18న.. ప్రాక్టికల్స్ పరీక్షలు రాసేందుకు ఓ పాఠాశాల ప్రిన్సిపల్.. 17మంది బాలికలను వేరే స్కూలుకు తీసుకెళ్లాడు. బాలికలు ఆ రోజు రాత్రి అక్కడే ఉండాల్సి వచ్చింది. అయితే ఆ సమయంలో మరొకరితో కలిసి ఆ ప్రిన్సిపల్ వారిపై లైంగిక దాడికి పాల్పడినట్టు తెలుస్తోంది. బాలికలకు ఇచ్చే ఆహారంలో మత్తుమందు కలిపి.. వారిపై అత్యాచారానికి కూడా ప్రయత్నించినట్టు సమాచారం. ఈ విషయాన్ని ఎవరికైనా చెబితే పరీక్షల్లో ఫెయిల్ చేస్తామని, కుటుంబసభ్యులను చంపేస్తామని వారు బెదిరించారు. చివరకు ధైర్యం చేసి.. ఈ వివరాలను బాలికలు వారి తల్లిదండ్రులకు చెప్పారు.
తల్లిదండ్రులు పోలీసులకు ఫిర్యాదు చేశారు. కానీ వారు పట్టించుకోలేదు. స్థానిక భాజపా ఎమ్మెల్యే ప్రమోద్ ఉత్వల్ జోక్యం చేసుకున్న తర్వాతే పోలీసులు తమ ఫిర్యాదు స్వీకరించారని బాలికల తల్లిదండ్రులు చెబుతున్నారు. అప్పుడే ఈ ఘటన వెలుగులోకి వచ్చింది.
సమాచారం అందిన వెంటనే.. ఈటీవీ భారత్ ఉత్తర్ప్రదేశ్ ఈ వార్తను ప్రచురించింది. తాజాగా.. ఈ వార్త ఆధారంగా ఉత్తర్ప్రదేశ్ మహిళా కమిషన్ చర్యలు చేపట్టింది. కేసుకు సంబంధించి.. అన్ని వివరాలను తమకు చెప్పాలని ముజఫర్నగర్ జిల్లా మెజిస్ట్రేట్ను ఆదేశించింది. ఈటీవీ భారత్ వార్త ఆధారంగా ఘటనను సుమోటాగా పరిగణిస్తున్నామని లేఖ రాసింది.
ఘటనపై ఎఫ్ఐఆర్ నమోదు చేసిన పోలీసులు నిందితులను పట్టుకునేందుకు అయిదు బృందాలను ఏర్పాటు చేశారు. విధుల్లో నిర్లక్ష్యంగా వ్యవహరించిన స్టేషన్‌ హౌస్ ఆఫీసర్‌ను సస్పెండ్‌ చేసినట్లు ముజఫర్నగర్ ఎస్ఎస్పీ అభిషేక్‌ యాదవ్‌ తెలిపారు
ఇదీ చూడండి:- చెల్లెలిపై మూడు నెలలుగా అన్న అత్యాచారం.. చివరకు..
