14ఏళ్ల బాలికను అపహరించి బలవంతంగా మత మర్పిడి చేసి వివాహం చేసుకున్న యువకుడిని ఉత్తరప్రదేశ్లోని గోరఖ్పుర్ పోలీసులు అరెస్టు చేశారు. బాలిక తల్లి ఫిర్యాదు మేరకు ఇటీవల తీసుకువచ్చిన మతమార్పిడి వ్యతిరేక చట్టం కింద కేసు నమోదు చేశారు.
బిహార్ నుంచి వలస వచ్చి షాపూర్లో నివసిస్తున్న తబారక్ ఖాన్(23) అనే యువకుడు.. ఆరో తరగతి చదువుతున్న తన కూతురుని హింసిస్తున్నాడని బాలిక తల్లి ఆరోపించింది. మూడు రోజుల క్రితం కూతురు స్కూల్ బ్యాగ్లో 'నిఖానామా' (పెళ్లి పత్రం) అనే పత్రాన్ని కనుగొన్నట్లు వెల్లడించింది. కూతురుని ప్రశ్నించగా.. మార్చి 1న తబారక్ అపహరించి వివాహం చేసుకుని.. ఇంటి వద్ద వదిలివెళ్లాడని కూతురు వెల్లడించినట్లు పోలీసులకు తల్లి తెలిపింది. నిఖా నామాను పోలీసు స్టేషన్కు తీసుకువచ్చింది.
బాలిక తల్లి ఇచ్చిన ఫిర్యాదు మేరకు అపహరణ, యూపీ చట్టవిరుద్ధ మతమార్పిడి నిషేధ చట్టం-2020 కింద కేసులు నమోదు చేసినట్లు స్థానిక పోలీసు అధికారి ఎస్కే సింగ్ తెలిపారు. బాలిక వైద్య రిపోర్టులు ఇంకా రావాల్సి ఉందని చెప్పారు. బాలిక వాంగ్మూలాన్ని తీసుకున్న తర్వాత మరిన్ని కేసులు జతచేసే అవకాశాలున్నాయని అన్నారు. నిఖా నామాలో బాలిక పేరు మార్చినట్లు పేర్కొన్నారు. వివాహం జరిపించడానికి తబారక్కు సహకరించిన వ్యక్తి కోసం గాలిస్తున్నట్లు చెప్పారు.
ఇదీ చదవండి: అత్యాచారం కేసులో దోషికి 20 ఏళ్ల జైలు
