రాజకీయ నేత, మాజీ గ్యాంగ్స్టర్ అతీక్ అహ్మద్, అతడి సోదరుడు అష్రఫ్ను మీడియా ముందుకు ఎందుకు తీసుకొచ్చారని సుప్రీంకోర్టు ఉత్తర్ప్రదేశ్ ప్రభుత్వాన్ని ప్రశ్నించింది. ప్రయాగ్రాజ్లో ఏప్రిల్ 15న జరిగిన హత్యలకు సంబంధించి యోగి ఆదిత్యనాథ్ సర్కార్కు కీలక ప్రశ్నలు వేసింది సర్వోన్నత న్యాయస్థానం. అతీక్ సోదరుల హత్యల కేసులో ఏం చర్యలు తీసుకున్నారో చెప్పాలని ఉత్తర్ప్రదేశ్ ప్రభుత్వాన్ని ఆదేశించింది. ఈ వ్యవహారంపై ప్రభుత్వం తీసుకున్న చర్యలను వివరిస్తూ స్టేటస్ రిపోర్ట్ సమర్పించాలని జస్టిస్ ఎస్ రవీంద్ర భట్, జస్టిస్ దీపాంకర్ దత్తాతో కూడిన బెంచ్ శుక్రవారం స్పష్టం చేసింది. అతీక్ హత్యకు ముందు పోలీసుల ఎన్కౌంటర్లో అతడి కుమారుడు అసద్ మరణించిన ఘటనపైనా నివేదిక ఇవ్వాలని యోగి ప్రభుత్వానికి ఆదేశాలు జారీ చేసింది సుప్రీంకోర్టు.
ఉత్తర్ప్రదేశ్లో జరుగుతున్న వరుస ఎన్కౌంటర్లపై సుప్రీంకోర్టు విచారణ జరుపుతోంది. 2017 నుంచి రాష్ట్రంలో 183 ఎన్కౌంటర్లు జరిగాయని, వాటిపై దర్యాప్తు చేయాలని కోరుతూ అడ్వొకేట్ విశాల్ తివారి పిటిషన్ దాఖలు చేశారు. 2020లో జరిగిన వికాస్ దుబె ఎన్కౌంటర్లో జస్టిస్ బీఎస్ చౌహాన్ నేతృత్వంలోని జ్యుడిషియల్ ఎంక్వైరీ కమిటీ.. యోగి సర్కారుకు క్లీన్ చిట్ ఇవ్వడంపైనా పిటిషనర్ ప్రశ్నలు సంధించారు. ఈ నేపథ్యంలో జస్టిస్ చౌహాన్ నివేదిక అనంతరం.. ప్రభుత్వం ఎలాంటి చర్యలు తీసుకుందో చెప్పాలని యోగి సర్కారును సుప్రీంకోర్టు ఆదేశించింది. ఈ సందర్భంగా పలు ప్రశ్నలు సంధించింది.
"అతీక్ అహ్మద్, అష్రఫ్ అహ్మద్ను పోలీసులు ఆస్పత్రికి తీసుకెళ్తున్నట్లు హంతకులకు ఎలా తెలిసింది? ఆస్పత్రి ఎంట్రీ గేటు వరకు అతీక్, అష్రఫ్ను పోలీసులు ఎందుకు నడిపించుకుంటూ తీసుకెళ్లారు? అంబులెన్సులోనే నేరుగా తీసుకెళ్లాల్సింది కదా? మీ వద్ద ఏ మెటీరియల్ ఉన్నా.. మాకు సమర్పించండి."
-సుప్రీంకోర్టు
అయితే, ప్రభుత్వానికి నోటీసులు జారీ చేయొద్దని ఉత్తర్ప్రదేశ్ సర్కారు తరఫున వాదనలు వినిపించిన సీనియర్ అడ్వొకేట్ ముకుల్ రోహత్గి విజ్ఞప్తి చేశారు. అహ్మద్ సోదరుల హత్యలపై రాష్ట్ర ప్రభుత్వం దర్యాప్తు చేస్తోందని సుప్రీంకోర్టుకు విన్నవించారు. దూరం పెద్దగా లేనందువల్లే ఆస్పత్రి గేటు వరకు అతీక్, అష్రఫ్ను నడిపించుకుంటూ తీసుకెళ్లినట్లు వివరించారు. 'ఈ వ్యక్తి(అతీక్), అతడి కుటుంబం 30 ఏళ్లుగా అనేక దారుణ నేరాలకు పాల్పడింది. వారిపై కోపంతోనే అహ్మద్ సోదరుల హత్య జరిగి ఉంటుంది. ఈ కోణంలో విచారణ జరుపుతున్నాం. నిందితులు ఫొటోగ్రాఫర్లలా వచ్చారు. కెమెరాలు, ఐడీ కార్డులు కూడా ఉన్నాయి. ఆ ఐడీ కార్డులు ఫేక్ అని తేలాయి. ఆస్పత్రి బయట చాలా మంది ఉన్నారు. అప్పుడే హత్య జరిగింది' అని రోహత్గి వివరించారు. వాదనలు విన్న ధర్మాసనం.. సమగ్ర నివేదిక సమర్పించాలని ఆదేశించింది. మూడు వారాల తర్వాత ఈ కేసును విచారించనున్నట్లు స్పష్టం చేసింది.
అతీక్ కుమారుడు అసద్ ఏప్రిల్ 13న ఝాన్సీలో జరిగిన పోలీసుల కాల్పుల్లో చనిపోయాడు. స్పెషల్ టాస్క్ఫోర్స్ పోలీసులు అసద్ను కాల్చి చంపారు. రెండ్రోజుల తర్వాత అతీక్ అహ్మద్, అతడి సోదరుడు అష్రఫ్ హత్యకు గురయ్యారు. మీడియా ప్రతినిధులుగా వచ్చిన ముగ్గురు యువకులు.. అతీక్కు పాయింట్ బ్లాంక్లో గన్ పెట్టి కాల్చారు. అష్రఫ్ పైనా కాల్పులు జరిపారు. దీంతో ఇరువురూ ఘటనాస్థలిలోనే కుప్పకూలి చనిపోయారు. ప్రయాగ్రాజ్లో ఈ ఘటన జరిగింది. నగరంలోని వైద్య కళాశాలలో మెడికల్ చెకప్ కోసం తీసుకెళ్తుండగా దుండగులు కాల్పులు జరిపారు. పోలీసుల సమక్షంలోనే కాల్పులు జరగడం వివాదాస్పదమైంది.
