Indian Embassy officials to leave Ukraine: రష్యా-ఉక్రెయిన్ మధ్య తీవ్ర ఉద్రిక్తతల నేపథ్యంలో రాయబార కార్యాలయ సిబ్బంది కుటుంబసభ్యులకు కేంద్రం కీలక సూచనలు చేసినట్లు తెలుస్తోంది. ఆ దేశాల మధ్య ఏ క్షణమైనా యుద్ధం జరగవచ్చని తక్షణమే కుటుంబ సభ్యులతో పాటు ఉక్రెయిన్ వదిలి స్వదేశానికి తిరిగిరావాలని సూచించినట్లు అధికార వర్గాలు తెలిపాయి. ఉక్రెయిన్ సరిహద్దుల్లో ఉద్రిక్తతల నేపథ్యంలో నాటో దేశాలు, రష్యా మధ్య విబేధాలు కొనసాగుతున్నాయి.
ఈ నేపథ్యంలో అత్యవసరం లేనివారు, విద్యార్థులు ఉక్రెయిన్ వీడాలని భారత రాయబార కార్యాలయం సూచించింది. అందుకు అనుగుణంగా కమర్షియల్, ఛార్టర్ విమానాలు అందుబాటులో ఉంచనున్నట్లు తెలిపింది. మరిన్ని వివరాల కోసం ఎంబసీ ఫేస్‌బుక్‌, ట్విట్టర్‌, వెబ్‌సైట్‌ చూడాలని పేర్కొంది. ఈ క్రమంలోనే ఎంబసీ సిబ్బంది కుటుంబసభ్యులు కూడా స్వదేశానికి రావాలని కేంద్రం సూచించినట్లు తెలుస్తోంది.
మరోవైపు తూర్పు ఉక్రెయిన్లో ఉద్రిక్త వాతావరణం నెలకొంది. ఉక్రెయిన్ సైన్యం, రష్యా వేర్పాటువాదుల పరస్పర దాడులు తారస్థాయికి చేరాయి. కాగా సరిహద్దుల్లో రష్యా అణుపాటవాన్ని ప్రదర్శిస్తోంది. అక్కడి పౌరులు సురక్షిత ప్రాంతాలకు తరలివెళ్తున్నారు. ఈ నేపథ్యంలో రష్యా ఎప్పుడేం చేస్తోందన్న భయాలు ఆదివారం మరింత తీవ్రమయ్యాయి.
ఇదీ చూడండి: ఒకే కుటుంబంలో నలుగురు మృతి.. ఆత్మహత్యా?
