స్నేహితుల వేట సరదా నలుగురి ప్రాణాలను బలిగొంది. అడవిలో వేటకు వెళ్తున్న క్రమంలో తుపాకీ మిస్ఫైర్ అయి ఓ యువకుడు ప్రాణాలు కోల్పోగా.. ఘటనపై తీవ్ర మనస్తాపానికి గురైన ముగ్గురు స్నేహితులు ఆత్మహత్య చేసుకున్నారు. ఈ సంఘటన ఉత్తరాఖండ్ తెహ్రీ జిల్లాలోని కుందీ గ్రామ సమీప అటవీ ప్రాంతంలో జరిగింది.
ఇదీ జరిగింది..
జిల్లాలోని భిలాంగన బ్లాక్లోని ఓ గ్రామానికి చెందిన ఏడుగురు స్నేహితులు శనివారం రాత్రి అడవిలోకి వేటకు వెళ్లారు. రాజీవ్(22) తూటాలు నింపిన తుపాకీతో ముందుండి తమ బృందానికి నాయకత్వం వహిస్తున్నాడు. ఈ క్రమంలోనే కాలుకి ఏదో తగిలి అదుపుతప్పి కిందపడిపోయాడు. తుపాకీ మిస్ఫైర్ అయి సంతోశ్ అనే యువకుడికి తూటా తగిలింది. రక్తం ఎక్కువగా పోవటం వల్ల సంతోశ్ అక్కడే ప్రాణాలొదిలాడు. ఈ ఘటనతో స్నేహితులంతా భయబ్రాంతులకు గురయ్యారు. ఈ క్రమంలోనే రాజీవ్ తుపాకీతో పరారయ్యాడు. మరో ముగ్గురు సోబన్, పంకజ్, అర్జున్లు.. క్రిమిసంహారక రసాయనాలు తాగి ఆత్మహత్యాయత్నం చేశారు.
రాహుల్, సుమిత్లు సమీప గ్రామానికి వెళ్లి జరిగిన విషయాన్ని గ్రామస్థులకు తెలిపారు. సంఘటనాస్థలానికి చేరుకున్న గ్రామస్థులు ఆత్మహత్య చేసుకున్న ముగ్గురిని బెలేశ్వర్ కమ్యూనిటీ హెల్త్ సెంటర్కు తరలించారు. అక్కడికి వెళ్లేలోపే పంకజ్, అర్జున్లు మరణించారు. చికిత్స పొందుతూ సోబన్ కూడా ప్రాణాలు కోల్పోయాడు.
బాధితులంతా 18 నుంచి 22 ఏళ్ల లోపువారే కావటం గమనార్హం. ఈ ఘటనపై అన్ని కోణాల్లో దర్యాప్తు చేపడుతున్నట్లు తెహ్రీ జిల్లా మెజిస్ట్రేట్ ఐవా ఆశిశ్ శ్రీవాస్తవా తెలిపారు. మృతదేహాలకు శవపరీక్ష నిర్వహిస్తున్నట్లు చెప్పారు.
ఇదీ చూడండి: జవాన్లపై 400 మంది నక్సలైట్ల ముప్పేట దాడి!
