కలెక్టర్​పై విషప్రయోగం!- సీబీ సీఐడీ దర్యాప్తు

పుదుచ్చేరిలోని కలెక్టర్​ కార్యాలయంలో తాగు నీటి సీసాలో కల్తీ ద్రవం దర్శనమిచ్చింది. ఈ విషయాన్ని గుర్తించిన ఆ పాలనాధికారి.. తక్షణ చర్యలు చేపట్టాలని ఆదేశించారు. ఈ కేసును సీబీ-సీఐడీ పోలీసులు దర్యాప్తు చేయనున్నట్లు స్థానిక డీజీపీ తెలిపారు.

పుదుచ్చేరి జిల్లా కలెక్టర్​ పూర్వా గార్గ్​కు అనూహ్య అనుభవం ఎదురైంది. ఈ నెల 6న(బుధవారం) ఆమె కార్యాలయంలో నిర్వహించిన ఓ అధికారిక సమావేశంలో విషపూరితమైన వాటర్​ బాటిల్​ దర్శనమిచ్చింది. గార్గ్​ వ్యక్తిగత సిబ్బందే ఈ నీటిని సరఫరా చేసినట్టు తెలుస్తోంది.

బాటిల్​లో తాగునీటికి బదులుగా రంగులేని కల్తీ ద్రవాన్ని గుర్తించిన గార్గ్​.. పోలీసులకు ఫిర్యాదు చేయాలని కార్యాలయ సిబ్బందికి ఆదేశించారు. అనంతరం అక్కడి ప్రత్యేకాధికారి సురేశ్​ రాజ్​.. ఈ విషయమై దర్యాప్తు కోరుతూ ఫిర్యాదు చేశారు.

ఫిర్యాదు పత్రం

ఈ వ్యవహారంపై ఐపీసీ సెక్షన్​-284 కింద కేసు(విష పదార్థాలకు సంబంధించి నిర్లక్ష్యంగా వ్యవహరించడం) నమోదు చేశారు పోలీసులు. అనంతరం స్థానిక డీజీపీ బీ. శ్రీవాస్తవ ఆదేశాల మేరకు సీబీ-సీఐడీ(క్రైమ్​ బ్రాంచ్​-క్రైమ్​ ఇన్వెస్టిగేషన్​ డిపార్ట్​మెంట్​)కి దర్యాప్తు కోసం బదిలీ చేశారు. సంబంధిత అధికారులు విచారణ చేపడతారని డీజీపీ తెలిపారు.

వాటర్​ బాటిల్ వ్యవహారంపై లెఫ్టినెంట్​ గవర్నర్​ కిరణ్​ బేడి.. దిగ్భ్రాంతికి లోనయ్యారు. కలెక్టర్​ నుంచి వచ్చిన ఆ ఫిర్యాదు పత్రాన్ని ఆమె మీడియాకు పంపారు.

ఇదీ చదవండి: తల్లీబిడ్డలను మోస్తూ మంచులో 3.5కి.మీ నడక