తన తండ్రిని తప్పుడు కేసులో అరెస్ట్ చేశారని.. బంగాల్ భీర్భుమ్ జిల్లాకు చెందిన ఓ బాలిక.. ప్రభుత్వంపై కోపం పెంచుకుంది. స్థానిక భాజపా నేత అయిన తన తండ్రి అరెస్ట్కు నిరసనగా ప్రభుత్వం అందించే ఉచిత సైకిల్ను తీసుకునేందుకు నిరాకరించింది. ఈ విషయాన్ని ఆ బాలిక చదువుతున్న పాఠశాల ప్రధాన ఉపాధ్యాయుడు వెల్లడించారు. ఉన్నతాధికారులకు ఈ సమాచారం అందించినట్టు పేర్కొన్నారు.
'చాలా కష్టాలు పడ్డాం..'
మౌత్రిష దేయ్.. పదో తరగతి చదువుతోంది. తండ్రి సుశాంత దేయ్ స్థానిక భాజపా నేత. అయితే 2020 సెప్టెంబర్ 17న ఆయన్ని పోలీసులు అరెస్ట్ చేశారు. తన తండ్రి పోలీసు కస్టడీలో ఉన్నన్ని రోజులు తాము చాలా ఇబ్బందులు పడ్డామని దేయ్ పేర్కొంది. అయితే ఆయన ప్రస్తుతం బెయిల్పై బయట ఉన్నారు.
సబుజ్ సాథీ పథకం కింద ప్రభుత్వ పాఠశాలల్లో చదివే 9 నుంచి 12వ తరగతి విద్యార్థినీ, విద్యార్థులకు బంగాల్ ప్రభుత్వం సైకిళ్లను పంపిణీ చేస్తోంది. ఈ పథకాన్ని సీఎం మమతా బెనర్జీ.. 2015లో ప్రారంభించారు. తాజాగా తండ్రి అరెస్ట్ నేపథ్యంలో సైకిల్ తీసుకునేందుకు నిరాకరించింది మౌత్రిష.
రానున్న అసెంబ్లీ ఎన్నికల నేపథ్యంలో తండ్రి ప్రేరేపించడం వల్లే.. ఆ బాలిక సైకిల్ తీసుకోలేదని తృణమూల్ కాంగ్రెస్ నేతలు ఆరోపించారు.
ఇదీ చూడండి: 'ఎన్నికల నాటికి మిగిలేది దీదీ ఒక్కరే'
