భారతీయ కిసాన్ యూనియన్ నాయకుడు రాకేశ్ టికాయత్ అన్నదాతలతో కలిసి హరియాణా ఫతేహ్బాద్ జిల్లా తొహానా సర్దార్ ఠాణా ముందు బైఠాయించారు. ఈ ధర్నాలో యునైటెడ్ కిసాన్ మోర్చా నేత యోగేంద్ర యాదవ్, గురుణామ్ సింగ్ కూడా పాల్గొన్నారు. అరెస్టైన రైతులను వెంటనే విడుదల చేయాలని డిమాండ్ చేశారు.
స్థానిక జేజేపీ ఎమ్మెల్యే దేవెందర్ సింగ్ బబ్లీపై కేసు నమోదు చేయాలని టికాయత్ కోరారు. బబ్లీ.. రైతులపై దుర్భాషలాడారని అన్నారు. జూన్1న బబ్లీ నివాసం వద్ద ఘెరావ్ నేపథ్యంలో రవి ఆజాద్, వికాస్ సిసార్ అనే ఇద్దరు రైతులను పోలీసులు అరెస్టు చేశారు.
"రైతులపై పెట్టిన కేసును ఎమ్మెల్యే వెనక్కితీసుకున్నారు. రైతులపై ఆయన చేసిన వ్యాఖ్యలకు క్షమాపణలు కోరారు. అయినప్పటికీ పోలీసులు.. అరెస్టు చేసి జైలుకు తరలించిన రైతులను విడుదల చేయడం లేదు. ఈ విషయంపై అధికారులతో మాట్లాడాం. రైతులను విడుదల చేసే వరకూ ధర్నా కొనసాగిస్తాం. వారిని విడుదల చేయకపోతే మమ్మల్నందరినీ అరెస్టు చేయాలని కోరుతాం."
--రాకేశ్ టికాయత్, బీకేయూ నేత.
రైతులు ఠాణా ముందు ధర్నాకు దిగిన నేపథ్యంలో.. పోలీసులు పెద్ద మొత్తంలో స్టేషన్ వద్దకు వచ్చారు.
ఇదీ చదవండి:టీకా తీసుకోకుండా తిరిగితే.. రూ.500 ఫైన్!
