ప్రముఖ వ్యాపారవేత్త ముకేశ్ అంబానీ నివాసానికి సమీపంలో పేలుడు పదార్థాలతో కలకలం రేపిన కారు వ్యవహారం కొత్త మలుపు తిరిగింది. ఆ కారు కొంతకాలం క్రితం చోరీకి గురైందని అధికారులు తెలిపారు. ఆ కారు అసలు యజమాని హిరెన్ మన్సుఖ్.. వారం క్రితం దీనిపై ఫిర్యాదు చేసినట్లు పేర్కొన్నారు. గురువారం.. అంబానీ ఇంటికి దగ్గర్లో పార్కు చేసి ఉన్న కారు దృశ్యాలు చూసిన తర్వాత మన్సుఖ్.. పోలీసు కమిషనర్ కార్యాలయానికి వచ్చారని అధికారులు వెల్లడించారు.
కారు ఎలా పోయింది?
ఠాణె జిల్లాకు చెందిన మాన్సుఖ్.. ఫిబ్రవరి 17న ఓ వేడుకకు వెళ్తుండగా కారు చెడిపోవడం వల్ల ఐరోలీ ములుండ్ బ్రిడ్జ్ సమీపంలో పార్కు చేశారు. తర్వాత రోజు కారును తెచ్చుకోవడానికి వెళ్లగా.. అక్కడ లేదు. నాలుగు గంటలు పాటు వెతికిన తర్వాత కారు పోయినట్లు గుర్తించి.. పోలీసులకు ఫిర్యాదు చేశానని మన్సుఖ్ తెలిపారు.
ఎఫ్ఐఆర్ నమోదు..
అంబానీ నివాసం దగ్గర్లో పేలుడు పదార్థాల కారు పార్కింగ్ ఘటనపై కేసు నమోదు చేసినట్లు ముంబయి పోలీసులు తెలిపారు. సీసీటీవీ ఫుటేజ్ ఆధారంగా.. ఈ ఘటనతో సంబంధం ఉన్న గుర్తుతెలియని కొందరి వ్యక్తులపై గామ్దేవి పోలీసు స్టేషన్లో ఎఫ్ఐఆర్ దాఖలు చేసినట్లు పేర్కొన్నారు. ఆ కారులో ఓ లేఖ కూడా లభించినట్లు తెలిపారు. "ఇది చిన్న ఝలక్ మాత్రమే. వచ్చేసారి సామాను(బాంబులు) పేలేలా పెడతాము)" అని రాసి ఉన్నట్టు తెలిసింది.
ఇదీ చూడండి: ముకేశ్ అంబానీ నివాసం సమీపంలో పేలుడు పదార్థాల కలకలం
